Xefe Governu Timor-Leste, Kay Rala Xanana Gusmão, ohin, loron 7 fulan-jullu tinan 2023, simu vizita husi Ministra Negósius Estranjeirus Austrália nian, Penny Wong, iha Palásiu Governu, Díli. 

Vizita ofisiál Penny Wong nian mai Timor-Leste ninia objetivu mak atu hato’o kongratulasaun ba Xanana Gusmão nia nomeasaun nu’udar Primeiru-Ministru hosi IX Governu Konstitusionál no kontinua hametin kooperasaun no amizade entre nasaun rua ne’e.

Durante enkontru ne’e, Ministra Penny Wong mós hato’o filafali kompromisu Austrália nian hodi fó apoiu ba Timor-Leste iha área oinoin, husi dezenvolvimentu ekonómiku to’o apoiu ba prosesu adezaun ba ASEAN, no mós ba área kooperasaun seluk-seluk tan, hanesan saúde, edukasaun, defeza no seguransa.

Primeiru-Ministru esplika katak Governu Timor-Leste daudaun ne’e diskute hela Programa Governu atu haruka ba Parlamentu Nasionál. Bainhira  Programa hetan ona aprovasaun, setór ida-idak bele kontakta ho Austrália atu diskute posibilidade apoiu sira.

Partisipa mós iha enkontru ne’e Ministru Negósius Estranjeirus no Kooperasaun Timor-Leste nian, Bendito Freitas, Ministru Petróleu no Minerais, Francisco da Costa Monteiro, Embaixadora Timor-Leste nian iha Austrália, Inês Almeida, no Enkarregada Negósius husi Departamentu Negósius Estranjeirus Austrália (DFAT) nian, Caitlin Wilson.