Nota Pezar ba Isabel da Costa Ferreira nia mate
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Nota Pezar ba Falesimentu husi Isabel da Costa Ferreira
Ho laran triste tebes no sentimentu ne’ebé kle’an, bainhira Governu Repúblika Demokrátika Timor-Leste simu notísia kona-ba falesimentu Isabel da Costa Ferreira, Primeiru-Ministru, Taur Matan Ruak nia espoza, iha loron 18 fulan-juñu tinan 2023, iha Hospital Nacional Guido Valadares, tanba moras kankru.
Isabel da Costa Ferreira, moris iha loron 15 fulan-abríl tinan 1974, iha Munisípiu Manufahi, durante nia moris tomak kaer ona kargu umanitáriu oin-oin, ba defeza direitus umanus no polítiku.
Nia estuda Direitu, iha Universidade Nasionál Denpasar, iha Bali, Indonézia no iha ninia moris nia hola parte liu iha luta ba direitus umanus no durante períodu okupasaun militár indonézia nian, ho ativu halo denúnsia kona-ba violasaun hirak ne’ebé akontese.
Hosi tinan 1998 to’o 1999, nia asume ninia funsaun hanesan Koordenadora Jerál ONG Kontras Timor-Timur no hosi tinan 1999 to’o 2001, hanesan Diretora Komisaun Direitus Umanus Timor Lorosa’e (CDHTL - Sigla iha lian portugeza) nian.
Iha tinan 2001, eleita nu’udar Membru Asembleia Konstituinte, husi lista UDT nian, hodi dedika ninia-an liuliu ba redasaun artigu sira Konstituisaun Timor-Leste nian, ne’ebé iha relasaun ho direitus umanus.
Dona Isabel hanesan konsultora ba Direitus Umanus, durante Administrasaun Tranzitória Nasoins Unidas nian, iha Governu Tranzisaun Timor-Leste II. Hafoin Restaurasaun Independénsia, Isabel Ferreira sai responsavel ba kargu umanitáriu oioin , direitus umanus no polítiku, liuliu hanesan Vise-Prezidente Krús Vermella Timor-Leste (CVTL - Sigla iha lian portugeza), husi tinan 2002 to’o 2005, nu’udar Asesora ba Direitus Umanus iha gabinete Primeiru-Ministru nian husi tinan 2001 to’o 2006 no hanesan Membru Komisaun Verdade no Amizade (CVA - Sigla iha lian portugeza) husi tinan 2005 to’o 2008.
Iha tinan 2006 hetan nomeasaun hanesan Vise-Ministra Justisa, hafoin ne’e nia hetan kargu oioin iha Governu no Primeira-Dama Timor-Leste nian, hosi loron 20 fulan-maiu tinan 2012 to’o loron 20 fulan-maiu tinan 2017. Iha tinan 2022 nia kandidata an ba eleisaun prezidensiál.
Portavós Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu tomak nia naran, iha momentu susar no triste ida-ne’e, hato’o “kondolénsia ne’ebé sinsera tebes ba Primeiru-Ministru, ba família enlutada no timoroan tomak ne’ebé sente lakon”. Portavós ne’e afirma mós katak, “asaun sira no ninia kompromisu ne’ebé kle’an ba direitus umanus, justisa no solidariedade sei rai nafatin iha ami-nia memória no ami-nia fuan”. REMATA
