……………………………………………………………………………………………………………
Komunikadu Imprensa
Nota Informativa kona-ba Alterasaun Lisensiamentu Atividade Ekonómika sira
Governu, liuhusi Dekretu-Lei n. 83/2022, loron 23 fulan-novembru, halo alterasaun dahuluk ba Dekretu-Lei n. 34/2017, loron 27 fulan-setembru, kona-ba lisensiamentu atividade ekonómika, ho objetivu prinsipál atu halo prosesu lisensiamentu sai previzivel, transparente no simples liután.
Alterasaun ida-ne’e nu’udar rezultadu husi levantamentu ida ba prátika sira ezistente no serbisu ne’ebé realiza ona husikedas tinan 2019, ho objetivu atu konsolida reforma lisensiamentu atividade ekonómika nian, klarifika prosedimentu, habadak prazu no hamenus enkargu hodi loke negósiu iha país ne’e.
Entre alterasaun sira ne’ebé prevee iha diploma ne’e, maka inkui substituisaun husi sistema autorizasaun anteriór ho sistema komunikasaun prévia nian ida, ne’ebé nu’udar simplifikasaun no garantia ba liberdade empreza ne’ebé boot tebes, hodi haree katak sistema komunikasaun prévia, tuir definisaun, maka sistema administrativu ida ne’ebé simples liu no ladún limita liberdade empreza nian duké sistema autorizasaun.
Daudaun ne’e, empreza sira bele hahú kedas sira-nia atividade ekonómika sira hafoin realiza komunikasaun prévia, la depende ba aktu administrativu ida ne’ebé emite husi entidade administrativa ruma.
Relasiona ho sentralizasaun prosedimentu sira iha SERVE, laiha kualkér alterasaun. SERVE kontinua sai responsavel ba fasilitasaun atu hetan lisensa setoriál sira, tuir lei korrespondente iha kazu ida-idak.
La prejudika sistema prosedimentál “one-stop-shop” ne’e, ka balkaun úniku. Iha rejime jurídiku anteriór, SERVE emite autorizasaun no fasilita atu hetan lisensa setoriál sira, tuir saida maka lei korrespondente determina ona, enkuantu ho rejime atuál ne’e, SERVE simu deklarasaun prévia husi inísiu atividade nian, envezde emite autorizasaun, hodi kontinua fasilita atu hetan lisensa setoriál sira, nune’e mós konforme saida maka determina ona hosi lei korrespondente ba kazu ida-idak.
Presiza mós hatene katak tantu iha versaun anteriór hosi rejime jurídiku ida-ne’e, nune’e mós ho alterasaun atuál, la temi kona-ba kualkér ezijénsia hodi emite paresér sira kona-ba atribuisaun lisensa nian.
Ezersísiu ba atividade ekonómika husi empreza sira depende de’it ba deklarasaun prévia husi empreza rasik no la implika kualkér prosedimentu atu emite autorizasaun no atu satán emisaun paresér ba efeitu ne’e.
Kona-ba ezijénsia formuláriu própriu ida deklarasaun prévia nian, importante mak esklarese katak Dekretu-Lei n. 83/2022, loron 23 fulan-novembru prevee ninia aprovasaun liuhusi diploma regulamentár ida, hanesan mós prevee ona iha versaun anteriór. Maibé, enkuantu diploma ne’e la vigora, sei aplika sistema autorizasaun ne’ebé eziste ona, nune’e, atu garante tranzisaun ida ne’ebé klara no simples entre rejime sira.
Hakarak mós atu salienta katak rejime foun ida-ne’e la hamenus kontrolu ba atividade sira ne’ebé iha risku . Distinsaun entre atividade sira ne’ebé ho risku ki’ik, médiu no boot ne’ebé halakon ona, tanba ida-ne’e hatudu inefikás hanesan mekanizmu kontrolu nian kona-ba atividade sira ne’ebé iha risku nia laran. Iha rejime anteriór, kontrolu ba atividade sira ne’ebé iha risku, asegura liuhusi lei lisensiamentu setoriál nian. Iha rejime atuál, la haree ba kualifikasaun husi risku ki’ik, médiu ka boot, kontrolu ba atividade sira ne’ebé iha risku kontinua asegura liuhusi lei lisensiamentu setoriál nian. Iha sorin seluk, rejime foun halakon arbitrariedade iha emisaun autorizasaun husi SERVE, atu garante seguransa jurídika ida ne’ebé boot tebes.
Kona-ba uzu meiu eletróniku sira, ne’ebé prevee ona iha rejime legál anteriór, agora ho intensaun atu habelar no hakle’an ninia ámbitu ho kriasaun ba balkaun eletróniku úniku ida, ne’ebé sai hanesan knaar ida atu hala’o husi SERVE iha ámbitu ninia autonomia no kapasidade implementasaun nian.
Ikus liu, hein katak bele implementa alterasaun sira ne’ebé introdús ona husi Dekretu-Lei n. 83/2022, ne’ebé implementa ho loloos, tanba simplifikasaun ba prosedimentu ne’e, halakon diskrisionaridade, seguransa jurídika ne’ebé boot tebes no garantia korrespondente ba liberdade empreza, hodi hadi’a persesaun no avaliasaun ambiente negósiu nian iha Timor-Leste, ho konsiderasaun ba parámetru sira husi ASEAN, Organizasaun Mundiál Komérsiu no Banku Mundiál. REMATA