Iha loron 6 fulan Juñu, tinan 2022, iha eskola 24 Munisípiu Baucau nian, simu ekipamentu sira mak hanesan, fogaun, sasanan, fatin tau bee nian no bandeja sira servisu nian, ho objetivu atu mellora preparasaun ba refeisaun sira no ba ijiene dapur sira eskola sira ne’e nian.

Ekipamentu hirak ne’e, sei tulun hodi fó garantia  ba labarik sira, ne’ebé liu 4.200, lorloron, iha Baucau, ba aihan ne’ebé maka nutritivu no seguru.

Projetu idne’e, ho ninia títulu, “Dehan Lae ba 5 S”, ne’ebé mai husi parseria ida entre Programa Alimentár Nasoens Unidas nian (PAM) no husi Organizasaun Mundiál Saúde, no konta ho apoiu finanseiru husi Repúblika Coreia no KOICA, ho valór dólar amerikanu millaun 7,8 durante tinan lima, iha eskola 400, hodi kombate ba desnutrisaun infantil, ba verme sira ne’ebé hada’et husi rai, ba moras kulit, ba tabaku no ba konsumu bebida sira ne’ebé midar.

To’o tinan 2025, labarik feto no mane sira husi munisípiu tolu nian, hamutuk rihun 79.000, maka sei hetan benefísiu husi projetu ida ne’e, tintinan. Inisiativa ida ne’e, realiza iha parseria ho Ministériu Edukasaun, Juventude no Desporto no Ministériu Administrasaun Estatal.

Durante serimónia entrega nian, ne’ebé hala’o iha EBF Fatulia-Venilale, iha Baucau,  Responsável husi Programa sira PAM nian, Ali Khan, hateten katak, “aihan eskola nian maka hanesan forma ida ne’ebé signifikativa no di’ak-liu, ne’ebé maka Governu Timor-Leste hala’o hela hodi garante nutrisaun no kombate deznutrisaun krónika. Kontribuisaun husi KOICA ba programa ne’e iha Baucau, ohin kompleta ona apoiu hirak ne’ebé maka fornese ona ba eskola sira iha Manufahi no Bobonaru no reprezenta hakat ida tan, ambisaun ba realizasaun ida ne’e”.

Diretór-Adjuntu KOICA nian iha Timor-Leste, Kwangsoo An, hatudu ninia “haksolok ba te’in aihan hirak ne’ebé maka di’ak tebtebes, ne’ebé maka ohin alkansa ona, no hodi rona ba planu sira PAM no Ministériu Edukasaun nian, atu fó apoiu ba eskola sira iha Timor-Leste”.

Prezidente Autoridade Munisipál Baucau nian, Olívio Freitas, agradese ba PAM no ba KOICA, ba apoiu fortalesimentu alimentasaun eskolár nian no konfirma kompromisu ba konstrusaun kozinha eskolár foun hat, iha munisípiu ne’e durante faze tuir mai programa nian.