Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 17 fulan-maiu tinan 2023

Konsellu Ministrus hala’o sorumutuk iha Palásiu Governu, iha Dili no, aprova projetu Rezolusaun Governu, ne’ebé aprezenta husi Ministra Negósius Estranjeirus no Kooperasaun, ne’ebé aprova Akordu Kooperasaun entre Governu Repúblika Demokrátika Timor-Leste no Governu Estadu Kuwait kona-ba Estabelesimentu Komité Konjuntu, ne’ebé ho objetivu atu dezenvolve relasaun bilaterál sira entre nasaun rua ne’e no ne’ebé sei ho misaun:

• atu realiza konsulta no koordena kestaun polítika sira interese komún nian;
• atu dezenvolve no akompaña prosesu kooperasaun iha área ekonomia, komérsiu, investimentu, finansas  no área sira seluk ne’ebé iha ligasaun;
• atu promove kooperasaun iha área kultura, siénsia, informasaun, saúde no servisu sosiál; no
• atu fó kontinuasaun ba implementasaun akordu no programa kooperasaun sira ne’ebé halo ona entre nasaun rua-ne’e.

…..

Aprova mós projetu Dekretu Governu, ne’ebé aprezenta husi Ministru Transportes no Komunikasoins, kona-ba Rejime pezu/todan ne’ebé autoriza ba veíkulu transporte sira.

Dekretu Governu ne’e define konjuntu pezu, prosedimentu no rejime infrasaun sira hodi kria sistema ida-ne’ebé efisiente no efikás iha kontrolu pezu veíkulu transporte nian sira ne’ebé sirkula iha territóriu nasionál.

…..

Ikusliu, aprova projetu Dekretu Governu, ne’ebé aprezenta husi Ministru Ensinu Superiór, Siénsia no Kultura, ba alterasaun daruak Dekretu Governu n. 2/2015, loron 14 fulan-janeiru, ne’ebé aprova subsídiu akadémiku, bónus ba xefia no komplementu estraordináriu ba dosente Universidade Nasionál Timor Lorosa’e (UNTL).  

Alterasaun ida-ne’e ninia objetivu mak atu armoniza konteúdu husi diploma ida-ne’e ho rejime ne’ebé prevee ona, tuir lei, iha Dekretu-Lei no. 7/2012, loron 15 fulan-fevereiru, hafoin ninia alterasaun datoluk, no foun liu, ne’ebé mosu bainhira Dekretu-Lei no. 62/2022, loron 31, fulan-agostu,  tama iha vigór. Dekretu-Lei ikus ne’e introdús ona alterasaun ruma ne’ebé relasiona ho ingresu, promosaun no progresaun iha karreira dosente universitária, liuliu ho kriasaun nivel foun sira. REMATA