Sorumutuk Estraordináriu Konsellu Ministrus nian iha loron 27 fulan-abril tinan 2023
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 27 fulan-abril tinan 2023
Konsellu Ministrus hala’o sorumutuk iha Palásiu Governu, iha Dili no aprova ona projetu Dekretu Governu, ne’ebé aprezenta husi Ministru Turizmu, Komérsiu no Indústria, ne’ebé kria Sekretariadu Nasionál ba Adezaun ba Organizasaun Mundiál Komérsiu nian.
Objetivu husi Sekretariadu Nasionál ba Adezaun ba Organizasaun Mundiál Komérsiu nian maka atu garante efisiénsia no efikásia ekipa téknika no sustentabilidade serbisu to’o adezaun efetiva país nian ba organizasaun no armonizasaun no adekuasaun sistema nasionál administrasaun no jestaun ekonomia nian ba norma regulamentár no padraun sira Organizasaun nian. Estrutura proposta, ne’ebé sei depende ba membru Governu ne’ebé responsavel ba área komérsiu no indústria sei dirije husi Koordenadór-Jerál ida no sei inklui profisionál espesializadu iha área prinsipál iha ámbitu adezaun ba Organizasaun Mundiál Komérsiu nian, liuliu, iha asuntu komérsiu internasionál bens no servisu no propriedade intelektuál, no sei kompoin mós husi profisionál sira iha área apoiu tékniku administrativu no finanseiru, no ba monitorizasaun no avaliasaun.
…..
Konsellu Ministrus delibera ona, tuir projetu ne'ebé aprezenta husi Ministru Petróleu no Minerais, hodi autoriza despeza ba transferénsia fundu nian husi Orsamentu Jerál Estadu, ba Programa “401 Jestaun rekursu petrolíferu no minerál” husi Ministériu Petróleu no Minerais (MPM), ba empreza públika TIMOR GAP E.P., ho valor dolar amerikanu millaun 54.
Transferénsia fundu sira ne’e ninia objetivu mak atu permite katak TIMOR GAP E.P., iha rekursu sira neébé presiza hodi garante kumprimentu husi sira nia objetivu,relasiona ho atividade jestaun ba patrimóniu petróleu nian.
…..
Ikusliu, Konsellu Ministrus delibera ona, tuir projetu ne’ebé aprezenta husi Ministru Transporte no Komunikasaun, hodi aprova prosedimentu sira aprovizionamentu OCB/001/MTC-2022 no RFP/066/MTC-2022, respetivamente relasiona ho konsesaun no konstrusaun pista, taxiway, torre kontrolu no area atu estasiona aeronave sira iha Aeroportu Internasionál Prezidente Nicolau Lobato, no ba jestaun projetu husi Projetu Dezenvolvimentu Aeroportu Internasionál Prezidente Nicolau Lobato nian. REMATA
