Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 26 fulan-abril tinan 2023

Konsellu Ministrus hala’o sorumutuk iha Palásiu Governu, Dili no aprova projetu Dekretu-Lei, ne’ebé aprezenta husi Ministru Ensinu Superiór Siénsia no Kultura, kona-ba Komisaun Nasionál Organizasaun Nasoins Unidas nian ba Edukasaun, Siénsia no Kultura (UNESCO) Timor-Leste nian.

Objetivu husi diploma ida-ne’e atu substitui Komisaun Nasionál UNESCO anteriór Timor-Leste nian ba servisu públiku sentrál Administrasaun Direta Estadu nian ida-ne’ebé foun, dependente ba membru governu foun ne’ebé responsavel ba área kultura nian. Dekretu-Lei ida-ne’e ho objetivu atu define estrutura orgánika interna foun ida no posibilita envolvimentu boot husi Governu ba funsionamentu  no atividade husi komisaun ida-ne’e.

Komisaun Nasionál UNESCO Timor-Leste nian ninia misaun maka atu fó apoiu no dezenvolvimentu programa no realizasaun UNESCO nian iha territóriu nasionál, hodi buka atu envolve sidadaun no organizasaun nasionál sira iha melloria husi kompriensaun ba malu entre povu sira no iha promosaun ba justisa, dame no seguransa internasionál.

….

Aprova mós projetu Dekretu Governu nian, ne’ebé aprezenta husi Ministra Negósius Estranjeirus no Kooperasaun, ne’ebé Regulamenta Medida sira ba Protesaun Sidadaun Timoroan iha Rai-li’ur.

Ho Dekretu Governu ida-ne’e halo regulamentasaun ba medida protesaun ba sidadaun timoroan sira iha rai-li’ur. Ne’ebé prevee iha Dekretu-Lei n. 77/2022, loron 26, fulan-outubru, permite ninia aplikasaun ba parte servisu administrasaun públika nian.

Maske kuadru normativu fundamentál ne’ebé presiza hodi fó protesaun ba timoroan sira iha rai-li’ur aprova ona, presiza halo aprovasaun tan ba norma jurídika sira ne’ebé sei operasionaliza aplikasaun konkreta husi medida protesaun sira ne’ebé temi ona.

Tuir diploma ne’ebé refere, konstitui ho medida sira ba protesaun sidadaun timoroan iha rai-li’ur, no hodi fó tulun karik iha kazu katástrofe naturál, ka ho perturbasaun grave ba orden públika, hodi lori filafali mai timoroan sira iha rai-li’ur, apoiu ba emerjénsia ba alojamentu, apoiu hahán emerjénsia nian no apoiu karik iha kazu tama prizaun ka detensaun.

….

Konsellu Ministrus delibera ona atu aprova, tuir projetu ne’ebé aprezenta husi Ministru Defeza, ba realizasaun ba prosedimentu exesionál ba rekrutamentu militár nian no hahú husi fulan-maiu tinan 2023 no determina ona katak efetivu atu inkorpora iha prosedimentu ida-ne’e inkorporasaun sei rekruta hamutuk ema na’in 87, ho númeru ida-ne’e fahe hanesan tuir mai ne’e: a) Militár na’in 29 ba Kuartél Jenerál; b) militár na’in 10 ba Komponente Terrestre; c) Militár na’in 12 ba Komponente Navál; d) Militár na’in 6 ba Komponente Aérea Lijeira; e) militár na’in 5 ba Sentru Instrusaun Komandante Nicolau Lobato; f) Militár na’in 18 ba Unidade Apoiu Servisu; g) militár na’in 4 ba Unidade Polísia Militár; militár na’in 3 ba Unidade FALINTIL.

….

Konsellu Ministrus delibera ona, tuir projetu ne’ebé Ministru Finansas maka aprezenta, hodi autoriza realizasaun despeza ida ho valór dolar amerikanu millaun 21,1.  Despeza ne’e atu uza ba akizisaun asaun sira Timor-Telecom nian, S.A. nian no kréditu sira husi empreza ne’e nian, ba empreza TPT-Telecomunicações Públicas de Timor, S.A., ba empreza PT Partisipações, SGPS, S.A, no ba empreza Portugál Telecom Internacional Finance BV.

….

Ikusliu Ministra Negósiu Estranjeirus no Kooperasaun halo ona aprezentasaun ba Konsellu Ministrus kona-ba pontu situasaun Prosesu adezaun Timor-Leste ba ASEAN. REMATA