Horiseik iha loron 20 fulan-marsu tinan 2023, aviaun dahuluk ho bandeira Timor-Leste halo sasemok inaugurál, aviaun A320 ne’ebé halo operasaun husi kompañia aérea nasionál Aero Dili Transport Service S.A. 

Sasemok inaugurál ne’e semo husi Indonézia mai tun iha Dili besik tuku 08:30 dadeer no lori pasajeiru sanulu-resin-hitu, ne’ebé inklui Ministru Transportes no Telekomunikasoins, José Agustinho da Silva. Aviaun ne’e to’o iha Aeroporto Internacional Presidente Nicolau Lobato iha prezensa husi membru Governu nian sira no Prezidente Repúblika, José Ramos-Horta.

Hahú loron 28 fulan-marsu, Aero Dili sei hahú sasemok regulár ba Indonézia no Singapura, ho planu sei semo mós ba Austrália, Xina no Filipinas.

Membru Governu nian sira ne’ebé marka prezensa iha serimónia ne’e, hatudu laran ksolok ba aviaun ho bandeira timorense ne’ebé to’o iha Timor, no sira fiar katak, sei hatún presu no hasa’e mobilidade no konektividade nasionál.

Governante sira salienta mós akordu kona-ba transporte aéreu sira ne’ebé asina ona ho país oioin durante mandatu Governu Konstitusionál VIII nian.