……………………………………………………………………………………………………………
loron 20, fulan-marsu, tinan 2023
Komunikadu Imprensa
Votu Pezar ba Fernando Xavier “MAUFORU” nia mate
Governu Timor-Leste, horiseik, loron 19 fulan-marsu tinan 2023, lori Timor-Leste tomak nia naran, hato’o laran triste ne’ebé kle’an ba Fernando Xavier “MAUFORU” nia mate, eis-Sekretáriu Sub-rejiaun Ainaru nian durante luta ba Libertasaun Nasionál Timor-Leste no fundadór Partidu Demokrátiku (PD) nian.
Fernando Xavier “MAUFORU” moris iha loron 15 fulan-agostu tinan 1947, iha Ainaru
Nia hamutuk ho Forsas Armadas ba Libertasaun Nasionál Timor-Leste (FALINTIL) iha tinan 1975, ne’ebé okupa postu Komandante Kompañia no hahú tinan 1993 sai hanesan Sekretáriu Sub-rejiaun Ainaru nian.
Durante okupasaun indonézia, nia hetan kastigu dala rua, entre fulan-janeiru tinan 1979 no fulan-dezembru tinan 1987 no mós entre fulan-janeiru tinan 1989 no fulan-setembru tinan 1993.
Iha loron 28 fulan-novembru tinan 2006, Fernando Xavier “MAUFORU” hetan kondekorasaun ho Orden Nicolau Lobato.
Primeiru-Ministru, Taur Matan Ruak, lembra Fernando Xavier “MAUFORU” hanesan “defensór ida ne’ebé la sente kolen ba autodeterminasaun nasionál” no hateten katak, ninia kontribuisaun ba istória Timor-Leste nian sei lembra ba nafatin”.
Portavós Governu Konstitusionál VIII, Ministru Fidelis Magalhães, lori Governu no Povu Timoroan tomak nia naran, hato’o sentidas kondolénsias ba família no amigu estimadu Fernando Xavier “MAUFORU” nian no hateten katak “Povu Timoroan sei nafatin agradese ba ninia kontribuisaun ba autodeterminasaun nasionál” no “ninia korajen no legadu sei nafatin metin iha ami hotu nia memória”. REMATA