Sekretaria Estadu ba Formasaun Professional no Empregu realiza Sorumutu  kona-ba Análize Konstranjimentu sira ba Kriasaun Empregu nian iha loron 26 to’o 27 fulan Maio tinan 2010, iha Ótel Arbiru, Dili

Diretór Diresaun Nasionál Empregu, SEFOPE, José Maria da Costa Soares iha abertura  “husu ba partisipante sira atu bele partisipa interativa, tanba rezultadu husi sorumutu ida ne’e, sai nu’udar dadus ba esbosu ida ba Estratéjia Nasionál  Empregu”

Iha diskusaun naruk durante sorumutu, partisipante sira koalia kona-ba dezafiu ne’ebé setór privadu sira hetan, tanba Governu la fó atensaun másimu ba timor-oan sira atu hala’o negósiu, governu la fo kredit mikro finansa nebé sustentavél, ladun kontrala ho diak merkadu livre iha Timor-Leste, hodi nuné fó impaktu negativu ba ekonomia no dezempregu iha Timor-Leste.

Iha fatin hanesan partisipante sira mos rekoñese katak dezempregu nebé a’as iha Timor-Leste tanba servisu nain timor-oan sira laiha kualidade atu kompete ho traballadór estranjeiru iha servisu fatin, tanba ne’e sira rekomenda ba Governu atu hadi’a kurríkulu eskola formál no non formál no kria lei ida forte atu fó assistensia hodi hala’o negosiu, hodi nuné estudante sira nebé remata sira nian estudu bele responde ezijénsia indústria nian.

Sekretáriu Estadu ba Formasaun Professionál no Empregu (SEFOPE) Bendito Freitas iha Esperansa katak “Resultadu husi sorumutu ne’e hanesan ideia rekomendasaun no input ka absorsaun atu sai hanesan esforsu kolektivu hodi rezolve dezafiu dezempregu iha Timor-Leste, tanba la’os SEFOPE mak responsavél kria empregu iha Timor-Leste, maibé ajuda kria polítika empregu. Aleinde ne’e iha Ministériu balun hanesan Ministériu Agrikultura no Obras Públiku bele oferese kampu servisu nebé bo’ot liu ba servisu nain sira iha Timor-Leste.”

Sorumutu ne’e realiza hetan apoiu husi Teknikal Officer International Labour Organization (ILO) Kazutoshi Chatani no partisipa mos Diretór no Téknika sira husi Ministériu hotu-hotu, Emprezáriu no Konfederesaun Sindikatu Timor Leste (KSTL).