……………………………………………………………………………………………………………
loron 7, fulan-marsu, tinan 2023
Komunikadu Imprensa
Nota Pezar ba Falesimentu husi Amo Francisco Tavares dos Reis
Governu Timor-Leste hato’o laran triste ne’ebé kle’an ba falesimentu Padre Francisco Tavares dos Reis nian, iha loron 7 fulan-marsu tinan 2023, ho idade 78, tanba moras ne’ebé nia enfrenta durante tempu naruk.
Padre Francisco nu’udar figura ida ne’ebé povu Timor-Leste hadomi tebtebes, ne’ebé dedika ninia moris hodi halo serbisu ba populasaun no promove valór solidariedade no fraternidade nian.
Padre Francisco Tavares dos Reis mós hala’o knaar importante ida hanesan konfidente (ema ne’ebé hetan fiar) no konselleiru ba eis-Prezidente no lider rezisténsia Timor nian, Nicolau Lobato, durante luta ba independénsia. Ninia korajen no dedikasaun hodi halo serbisu ba povu Timor, sei hanoin nafatin no ninia memória sei sai nafatin hanesan fonte inspirasaun ida ba jerasaun sira aban-bainrua nian.
Primeiru-Ministru, Taur Matan Ruak, espresa ninia sentimentu triste ba Padre Francisco Tavares nia lakon, hodi hateten katak “ita nia hanoin no orasaun hamutuk ho família, kolega no amigu saudozu Padre Tavares nian, atu sira bele hetan forsa no fiar ne’ebé presiza hodi hasoru liuliu iha momentu difisil ida-ne’e”.
Portavós Governu, Ministru Fidelis Magalhães, hato’o ninia “sentidus pézames no solidariedade ba populasaun Timor-Leste tomak, liuliu parókia sira ne’ebé maka nia serbí no semináriu ne’ebé nia hanorin ba” no hanoin hikas “ninia papél nu’udar edukadór, iha ne’ebé nia ajuda eduka no orienta joven sira durante ninia misaun tomak”, nafatin iha populasaun ninia sorin no ba sira-ninia defeza iha momentu sira ne’ebé difisil liu”. REMATA