Ministru Finansas, Rui Gomes no Ministra Negósius Estranjeirus no Kooperasaun, Adaljiza Magno, akompaña husi membrus Delegasaun Timor-Leste, hala’o reuniaun bilaterál ho Primeiru-Ministru Bhutan, Lotay Tshering, iha loron 6 fulan marsu tinan 2023, iha Doha, Katar.

Reuniaun Bilaterál entre Delegasaun Timor-Leste no Xefe Governu Bhutan ne’e akontese iha ámbitu Kinta Konferénsia Nasoins Unidas konaba Países Menus Dezenvolvidu (LDC5, sigla Inglés) ne’ebé ho tema jeŕál “Husi Potensiál ba Prosperidade”. 

Iha reuniaun bilaterál ne’e, Primeiru-Ministru Lotay Tshering fahe informasaun ba Delegasaun Timor-Leste sobre país Bhutan nia esperiénsia no lisaun aprendida sira husi sira-nia prosesu preparasaun atu gradua husi Países Menus Dezenvolvidu ne’ebé tuir planu sei akontese iha tinan ida-ne’e nia laran.

Durante tinan hirak ne’e nia laran, liuhusi lideransa Primeiru-Ministru Lotay Tshering, Bhutan halo ona  Reforma iha área xave lubun ida inklui reforma instituisaun finanseira no reforma setór públiku administrativu. Aleinde ne’e, Bhutan mós hahú investe maka’as iha área estratéjiku sira hanesan saúde no edukasaun.

Ministru Finansas, Rui Gomes hahú diskusaun ho hato’o kumprimentus husi Primeiro-Ministro: S.E. Taur Matan Ruak ba Primeiru-Ministru Lotay Tshering no hodi naran Delegasaun Timor-Leste, hato’o apresiasaun sinseru ba Primeiru-Ministru Lotay ne’ebé aseita ona pedidu audiénsia husi Delegasaun Timor-Leste.

Ministru Rui Gomes no Ministra Adaljiza Magno mós hato’o agradesimentu ba Primeiru-Ministru Lotay nia vontade di’ak hodi fahe ona Bhutan nia esperiénsia no lisaun aprendida sira. Delegasaun Timor-Leste toma nota ba informasaun útil husi Primeiru-Ministru Lotay no sei buka atu aprende husi lisaun aprendida hirak ne’e hahú husi ohin ba oin atu prepara di’ak liután Timor-Leste nia graduasaun husi Países Menus Dezenvolvidu iha futuru.