Vise-Ministru Finansas, ­­­António Freitas, iha loron 27 fulan-fevereiru tinan 2023, hala’o lansamentu ba teste ponte-báskula (plataforma tetu-todan) ba veíkulu merkadorias, ne’ebé instala iha Postu Integradu Fronteira Batugade, iha Munisípiu Bobonaru. 

Lansamentu ba teste sira ne’ebé hala’o ba ekipamentu ne’e, ninia objetivu atu kompriende konfigurasaun no funsionamentu mákina nian, hodi garante ninia efikásia iha fiskalizasaun ba todan veíkulu sira ne’ebé tula karga ne’ebé sirkula iha fronteira. Ponte-báskula ne’e sei permite hodi identifika veíkulu sira ne’ebé maka todan liu, hodi hamosu estragu ba estrada no ponte entre fronteira Batugade no kapitál Dili.

Obra ne’e hala’o husi empreza Mota Loes Unip. no ho kustu hamutuk dolar amerikanu rihun 139.

Vise-Ministru hatete katak iha tempu badak Ministériu Finansas hamutuk ho Ministériu Transportes no Komunikasoin sei aprezenta projetu Dekretu-Lei ne’e ba iha Konsellu Ministrus kona-ba tarifa sira ne’ebé maka sei aplika ba veíkulu merkadoria sira tuir todan husi ninia karga.

Infraestrutura tetu todan nian ida-ne’e sei koloka mós iha Postu Integradu Fronteira Salele, Munisípiu Kovalima no Sakato, iha Rejiaun Administrativa Espesiál Oe-Kusi Ambenu.