Iha loron 28 fulan-fevereiru tinan 2023, Delegasaun husi Politeknik Sekolah Tinggi Akuntansi Negara (STAN) Jakarta, Indonézia daudaun ne’e iha hela Díli hodi fasilita online test ba kandidatu bolseira/u Timoroan hamutuk 49 ne’ebé sei ba kontinua sira-nia estudu Diploma IV iha área Kontabilidade, Jestaun Finansas Públikas, Jestaun Patrimóniu Estadu. 

Durante sira-nia vizita mai Timor-Leste, Delegasaun husi Politeknik STAN Jakarta, Indonézia mós halo audiénsia ho Ministru Finansas Rui Gomes.

Iha reuniaun ne’e, Ministru Rui Gomes hodi naran Ministériu Finansas hato’o agradesimentu ba apoiu tomak ne’ebé mak Politeknik STAN Jakarta oferese ona mai Ministériu Finansas atu kapasita no dezenvolve di’ak liután Timoroan sira-nia koñesimentu no abilidade iha área importante sira hanesan Kontabilidade, Jestaun Finansas Públikas no Jestaun Patrimóniu Estadu.

Oitavu Governu Konstitusionál tau importansia ba “EMA” nu’udar sentru ba dezenvolvimentu. Iha OJE 2023 ne’ebé aprezenta ho lema “Investimentu Produtivu no Kresimentu Inkluzivu ba Jerasaun Futuru”, Governu aloka 36% ka $772 milliaun  ba Setór Kapitál Sosiál ne’ebé inklui Saúde, Edukasaun no Protesaun Sosiál. Setór ida-ne’e mak maiór benefisiáriu husi finansiamentu OJE 2023. Ida-ne’e refleta importansia ne’ebé mak Governu fó ba iha asesu universál ba edukasaun ne’ebé kualidade ($137 miiliaun ), saúde ($92 milliaun ) no protesaun sosiál ($301 milliaun ) liuliu ba grupu vulneravel.