Governu Timor-Leste, reprezenta husi ekipa téknika ida Ministériu Solidariedade sosiál no Inkluzaun (MSSI) no husi Diretór-Jerál Gabinete Estratéjia Planeamentu nian, hamutuk ho ekipa delegasaun Governu Portugál, diskute ona kona-ba planu konstrusaun Sentru Reabilitasaun Integradu (CRI sigla lian portugés) ida, husi loron 31 fulan-janeiru to’o loron 2 fulan-fevereiru tinan 2023, iha edifísiu Ministériu Solidariedade Sosiál no Inkluzaun nian, iha Dili.

Projetu ne’e ho ninia objetivu atu fornese atendimentu integradu ida ba labarik, joven no feto sira ne’ebé enfrenta violénsia bazeia ba jéneru, sira ne’ebé moris iha situasaun vulneravel no ho sira ne’ebé difikuldade atu asesu ba justisa.

Durante loron tolu, ekipa governamentál sira husi país rua ne’e, hamutuk halo avaliasaun ba nesesidade sira no viabilidade konstrusaun CRI iha munisípiu Ainaru.

Molok hala’o atividade ida-ne’e, durante fulan-janeiru, delegasaun portugeza ne’ebé akompaña husi Diretór-Jerál Solidariedade no Inkluzaun, Florêncio Pina Diaz Gonzaga, halo ona vizita ba fatin ne’e, iha Munisípiu Ainaru, iha ne’ebé sei harii Sentru Reabilitasaun Integradu. Rai ne’e no ninia luan totál ektare haat no serimónia lansamentu ba fatuk dahuluk sei hala’o iha fulan-marsu oin mai, ho prezensa ne’ebé prevee Ministra Traballu, Solidariedade no Seguransa Sosiál Portugal, Ana Mendes Godinho.

Ekipa téknika ne’e vizita mós organizasaun balun ne’ebé ativa hodi apoia vítima violénsia sira bazeia ba jéneru, hanesan Fundasaun Irmãs Reparadoras de Nossa Senhora de Fátima no Uma Mahon Maria Tapo, iha Munisípiu Bobonaru, Fundasaun Forum Komunikasaun Juventude Oratóriu Dom Bosco, Sentru Nasionál Reabilitasaun Bekora, Casa Vida, iha Munisípiu Dili no Fundasaun Klibur Domin iha Munisípiu Likisá.

Ekipa MSSI nian kompostu husi Diretór Jerál Solidariedade Sosiál no Inkluzaun, Florêncio Gonzaga, Diretór Jerál Administrasaun no Finansas, Rui Manuel Gago Exposto, Diretór Nasionál Inkluzaun no Reinsersaun Komunitária, Amândio Amaral Freitas, Diretór Nasionál ba Protesaun Direitu Ema ho Kondisaun Espesífika, Mateus da Silva, Xefe Gabinete Estudu Planeamentu no Dezenvolvimentu Institusionál, Gil da Cruz, Xefe Unidade Kooperasaun no Parseria, João Caimbra no mós Xefe Unidade Protokolu, Komunikasaun no Relasaun Públika, Silvia Verdial da Silva Lopes.

Delegasaun portugeza nian kompostu husi Diretór-Jerál GEP, José Luís Albuquerque, Vise-Prezidente Konsellu Diretivu Institutu Solidariedade Sosiál, IP, Catarina Marcelino, Diretora  Unidade Asaun Sosiál no Akollimentu Casa Pia, IP, Raquel Ferreira Afonso no Diretora Unidade Edukasaun no Formasaun Casa Pia, IP, Carla Gil.