Ministru Asuntu Parlamentár no Komunikasaun Sosiál (MAPCOMS – sigla iha lian portugés), Francisco Martins da Costa Pereira Jerónimo, partisipa iha serimónia entrega sertifikadu ba jornalista na’in 89 ne’ebé frekuente ona formasaun lian portugés iha tinan 2022 no fundamentu jornalizmu, iha ámbitu projetu Konsultóriu Língua ba Jornalista sira (CLJ – sigla iha lian portugés). Serimónia ne’e hala’o iha loron 10 fulan-fevereiru tinan 2023, iha auditóriu Sentru Kulturál Embaixada Portugál nian, iha Dili.

Formasaun projetu CLJ ne’e hanesan rezultadu husi akordu parseria ida entre Ministériu Asuntu Parlamentár no Komunikasaun Sosiál no Camões – Institutu Kooperasaun no Língua, I.P., Portugál, ho objetivu atu kapasita profisionál nasionál komunikasaun sosiál nian iha lian portugés atubele tranzmite informasaun ne’ebé kredivel ba públiku.

Iha ninia intervensaun, Ministru Francisco Jerónimo agradese apoiu Portugál nian hodi realiza projetu ida-ne’e iha parseria ho Governu Timor-Leste no foka ninia importánsia ba dezenvolvimentu kapasidade jornalista timoroan sira nian.

Governante ne’e insentiva jornalista sira atu aplika koñesimentu ne’ebé sira aprende durante formasaun iha sira-nia moris loron-loron nian no esforsu na hodi hadi’a kualidade sira-nia notísia atu nune’e populasaun sira bele hetan informasaun ho di’ak. 

Adida ba Kooperasaun Embaixada Portugál nian iha Dili, Cristina Faustino, salienta katak projetu Kooperasaun ida-ne’e, Konsultóriu Lian ba Jornalista sira, hala’o ona iha tinan 2016 no ninia kontinuasaun apoia ona dezenvolvimentu órgaun komunikasaun sosiál no kapasidade jornalista nasionál sira nian.

Cristina Faustino mós manifesta ninia haksolok ba susesu formasaun ida-ne’e no haree númeru joven aumenta ne’ebé hahú sira-nia perkursu iha mundu jornalizmu nian.

Serimónia ne’e konta mós ho partisipasaun Xefe Gabinete MAPCOMS, Koordenadór no Xefe Departamentu Sentru Formasaun Téknika Komunikasaun (CEFTEC – sigla iha lian portugés), formadór CLJ no formandu sira.