Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 15 fulan-fevereiru tinan 2023

Konsellu Ministrus hala’o sorumutuk iha Palásiu Governu, iha Dili no aprova ona projetu Dekretu-Lei, ne’ebé aprezenta husi Ministru Petróleu no Minerais, Víctor da Conceição Soares, ba alterasaun dahuluk Dekretu-Lei n. 31/2011, loron 27 fulan-jullu, ne’ebé kria Timor Gap - Timor Gás & Petróleu, E.P., no mós ba nia Estatutu sira.

Alterasaun ida-ne’e ninia objetivu atu enkuadra estatutu sira TIMOR GAP, E. P. ho kontestu atuál, no adapta objetivu no prinsípiu estruturante sira TIMOR GAP, E. P. nian nu’udar Empreza Públika, ho vizaun estratéjika ida hodi aselera kreximentu Empreza nian ba prazu médiu-naruk, atu atrai oportunidade investimentu iha setór petróleu, gás naturál no kualkér idrokarbonetu seluk no mós produtu seluk ne’ebé mai husi idrokarbonetu sira iha Timor-Leste.

Entre alterasaun sira ne’ebé define husi diploma ida-ne’e, destaka subordinasaun empreza nian ba podér sira tutela no superintendénsia hosi ministru idak-idak no aliñamentu husi sira-nia atividade ho orientasaun no objetivu sira Governu nian, nune’e mós posibilidade partisipasaun hosi Timor Gap iha kualkér operasaun petrolífera, liuliu operasaun sira ne’ebé realiza ona iha ámbitu Tratadu nian ne’ebé estabelese Fronteira Marítima sira iha Tasi Timor no rejime espesiál Greater Sunrise nian.

Diploma ne’e sei permite katak Timor Gap atu esplora área sira foun ba intervensaun no objetivu estratéjiku foun sira, ne’ebé aliña ona ho espetativa no orientasaun sira Governu nian ba dezenvolvimentu setór petróleu, gás naturál no idrokarbonetu seluk no mós produtu seluk ne’ebé mai husi idrokarbonetu sira.

….

Konsellu Ministru aprova ona projetu Dekretu-Lei, ne’ebé aprezenta husi Vise-Ministru Komérsiu no Indústria, Domingos Lopes Antunes, kona-ba Sistema unidade ba medida legál sira.

Projetu Dekretu-Lei ida-ne’e ninia objetivu mak atu garante katak unidade sira ba medida iha Timor-Leste utiliza ho modu hanesan no koerente iha Timor-Leste laran tomak, ne’ebé permite mediasaun sira ba sidadaun no entidade hotu-hotu bele kompriende, iha área oin-oin, hanesan komérsiu, indústria ka ensinu.

Inisiativa ida-ne’e ho ninia objetivu atu proteje mós konsumidór no kompañia sira, hodi obriga atu uza unidade medida nian sira ne’ebé públiku hatene, no ne’ebé garante konfiansa no rigór husi medisaun sira, hodi harii ambiente ida ne’ebé favoravel ba dezenvolvimentu ekonómiku.

Iha nivel internasionál, utilizasaun husi unidade medida legál internasionál nian sira maka nu’udár fatór konfiansa fundamentál ida ba esportasaun sira no atu selebra akordu bilaterál ka multilaterál nian sira, hanesan iha área komérsiu, enerjia, ensinu ka indústria.

….

Aprova ona projetu Dekretu-Lei kona-ba Rejime espesiál ba aprovizionamentu no kontratasaun iha área defeza no seguransa. Projetu Dekretu-Lei ne’e aprezenta husi Ministru Defeza, Filomeno da Paixão de Jesus, Vise-Ministru Interiór, António Armindo no Ministru Justisa, Tiago Amaral Sarmento.

Diploma ida-ne’e ninia objetivu mak atu kria rejime jurídiku ida ba aprovizionamentu, ne’ebé estabelese prosedimentu espesiál sira ho objetivu atu selebra kontratu públiku sira iha área defeza no seguransa, hodi garante kumprimentu ba medida espesiál sira seguransa no sijilu nian lubun ida iha área ida-ne’e. Objetivu ida tan, ne’ebé pretende ho diploma ida ne’e, mak atu esklui intermediáriu sira ne’ebé la iha relasaun komersiál eskluziva ho materiál espesífiku ida-ne’e, husi prosedimentu aprovizionamentu, nune’e, hodi permite uza fabrikante sira ho forma direta.

Projetu Dekretu-Lei ida-ne’e aplika ba formasaun kontratu sira ne’ebé ninia objetu mak akizisaun ka arrendamentu ba beins, prestasaun servisu sira no ezekusaun obra sira nian.

….

Konsellu Ministrus aprova ona projetu Dekretu-Lei, ne’ebé aprezenta husi Ministru Agrikultura no Peskas, Pedro dos Reis, kona-ba alterasaun dahuluk ba Orgánika Ministériu Agrikultura no Peskas nian.

Alterasaun ida-ne’e ho ninia objetivu atu reestrutura servisu sira Ministériu nian atu estabelese enkuadramentu ida ne’ebé estruturadu liu hodi haforsa polítika Governu nian ba setór Kuarentena no Bioseguransa. Tanba ne’e, prosede promosaun ba Servisu Kuarentena no Bioseguransa sai Diresaun-Jerál hosi Ministériu ida-ne’e, atu kumpre di’ak liu padraun internasionál sira, iha matéria sanitária no fitosanitária, ne’ebé estabelese ona husi organizasaun internasionál sira iha ne’ebé Timor-Leste sai nu’udar membru.

…

Konforme projetu ne’ebé aprezenta ona husi Ministru Obras Públikas, Abel Pires da Silva, Konsellu Ministrus delibera ona hodi aprova prosedimentu aprovizionamentu nian ba adjudikasaun husi kontratu públiku ida ne’ebé maka ninia ezekusaun husi obra sira no fornesimentu beins ba kriasaun komplexu ida komunikasoins nian ho instalasaun ida aterrajen nian ba kabu submarinu fibra ótika nian ne’ebé maka sei liga sidade Díli ho sidade sira Darwin no Pert Hedland nian, ne’ebé konklui sein  vensedór.

…

Tuir akordu projetu nian ne’ebé aprezenta mós husi Ministru Obras Públikas, Abel Pires da Silva, Konsellu Ministrus delibera ona hodi autoriza despeza kona-ba ezekusaun obra konstrusaun estrada nian entre Uatulari-Laisorulai iha munisípiu Vikeke, ho estensaun 22,527 Kms, ho valór estimadu husi servisu sira 22,7 millaun dolar amerikanu.

…

Konsellu Ministrus aprova projetu Dekretu Governu nian, ne’ebé aprezenta husi Ministru Administrasaun Estatál, Miguel Pereira de Carvalho, hodi altera kalendáriu operasaun ba resenseamentu eleitorál iha rai-li’ur.

Nune’e, formasaun ba membru sira Komisaun Resenseamentu Eleitorál nian sei hala’o iha loron 27 no 28 fulan-fevereiru tinan 2023, inskrisaun sira ba resenseamentu eleitorál iha estranjeiru sei hala’o hosi loron 1 to’o loron 31 fulan-marsu tinan 2023. Elaborasaun, extrasaun no remesa ba lista eleitór sira nian, liuhusi via eletrónika, husi misaun diplomátika sira no postu konsulár ida-idak sei hala’o iha loron 1 to’o 2 fulan-abril tinan 2023. Períodu espozisaun no reklamasaun ba lista eleitór sira nian ne’ebé halo ona resenseamentu iha rai-li’ur ne’e define ba períodu husi loron 3 to’o loron 7 fulan-abril tinan 2023 no sinkronizasaun husi sistema resenseamentu eleitorál nian, sei hala’o hosi loron 8 to’o loron 20 fulan-abril tinan 2023. Ikusliu, tenke publika númeru sira ne’ebé inskreve ona iha resenseamentu eleitorál iha loron 21 fulan-abril tinan 2023.

….

Tuirmai aprezentasaun ida husi Ministru Prezidénsia Konsellu Ministrus, Fidelis Manuel Leite Magalhães, kona-ba planeamentu organizasionál, monitorizasaun no avaliasaun, no jestaun dezempeñu iha organizasaun sira setór públiku nian, ba fortalesimentu responsabilidade, prestasaun kontas no transparénsia instituisaun estatál sira nian no mos ba hadi’a kualidade, efisiénsia no efikásia servisu sira ne’ebé presta ba populasaun.

….…

Ikusliu, Vise-Primeiru-Ministru no Ministru Planu no Ordenamentu, José Maria dos Reis, aprezenta ona estudu kona-bá opsaun sira ba lokalizasaun ba sidade administrativa foun. REMATA