Primeiru-Ministru, Kay Rala  Xanana Gusmão, ho nia kometiva kontinua hala’o konsulta ba PEDN tinan  2011-2030 ba dala 36  iha Distritu Manatotu, Sub-distritu Manatuto, loron 27, fulan Maiu, tinan 2010.

Administradór Sub-distritu Manatutu, António da Silva, hato’o sira nia preokupasaun ne’ebé populasaun enfrenta iha sira nia moris lor-loron hanesan estrada, bee-mós, uma, eletrisidade, klínika, no husu atu harii mini-merkadu iha suku hodi nune’e sira bele fan sira nia produtu  lokál ne’ebé iha .

Ejizénsia seluk hato’o husi Xefe suku Maabat, João da Silva, katak “Presiza tau matan ba povu liu-liu, iha parte estrada, konstrusaun uma ba ema kbi’it la’ek no husu kanaliza kanál irigasaun  nian hodi bele fornese bee ba komunidade nian natar.

Primeiru-Ministru, Xanana, iha nia intervensaun hateten katak, “atu responde ba nesesidade ne’ebé Manatutu-oan sira enfrenta, governu sei responde tuir Planu Estratéjiku ba Dezenvolvimentu Nasionál ne’ebé mak sei hahú iha kurtu prazu (2011-2015) médiu prazu (2015 – 2020) no longu prazu (2020 – 2030)”.

Xanana esplika liu tan katak, bainhira iha tempu UNTAET nian (2001), nia tun ba baze hodi hala’o konsulta, povu husu estrada, edukasaun, saúde, bee-mos, uma, eletrisidade, telekomunikasaun, agrikultura, maibé ita, ukun-a’an tinan 10 ona, povu sei moris iha muki’it nia laran nafatin, tanba ne’e mak nia mai hodi responde ba saída mak povu sira enfrenta oras ne’e dadaun.

Vizita PM Xanana Gusmão iha Sub-distritu Manatutu Vila akompaña husi Ministra Finansas, Emilia Pires, Vice Ministru Infrastrutura, Jose Manuel Carascalão, Sekretáriu Estadu Konsellu Ministru, Ágio Pereira, Sekretáriu Estadu Seguransa, Francisco Guterres, Sekretáriu Estadu Asisténsia Sosiál no Dezastre Naturál, Jacinto Gomes de Deus, Diretór Jerál Finansas Estadu, Ministériu Financas, Francisco Soares, deputada CNRT, Virgina Anabela no hetan vizita mós husi Amo Bispo Diocese Dili, Dom Alberto Ricardo, Diocese Baucau, Dom Basilio do Nacimentu no Diocese Maliana, Dom Norberto do Amaral.