Ministru Finansas, Rui Gomes, iha loron 6 fulan-fevereiru tinan 2023, hateten katak Programa Reziliénsia Komunitária Faze I no Faze II nian ne’ebé estabelese liuhusi kooperasaun bilaterál entre Governu Timor-Leste ho Governu Austrália, hodi finansia konstrusaun projetu infraestrutura eskala ki’ik iha Suku sira, ne’ebé benefisia ona Suku 390 husi Suku 452 iha Timor-Leste.

“Investimentu boot ho montante dolar amerikanu millaun 27 ne’e benefisia ona Suku 88% ho totál projetu eskala ki’ik hamutuk 419, ne’ebé kompostu husi projetu bee moos no saneamentu 230, projetu estrada no ponte 106 no seluk tan,” Ministru Rui Gomes hateten iha nia Diskursu iha Serimónia Asinatura Apoiu Orsamentu Direta ho Governu Austrália ba Programa “Reziliénsia Komunitária no Rekuperasaun Ekonómika ba Timor-Leste Durante Pandemia Globál COVID-19 Faze 3 nian” iha Auditóriu Kay Rala Xanana Gusmão, Ministériu Finansas.

Governante ne’e hatutan katak dezde fulan-juñu tinan 2022, benefisiáriu rihun 13 resin husi Munisípiu Ainaru, Bobonaru no RAEOA mós simu ona pagamentu Bolsa da Mãe Jerasaun Foun hafoin Governu lansa programa ne’e. Apoiu ne’e importante tebes hodi lori mudansa pozitiva ba inan-isin-rua sira no labarik deznutrisaun sira ne’ebé antes ne’e la inklui iha eskema Bolsa da Mãe.

Bazeia ba susesu husi pakote finansiamentu anteriór rua, ho totál dolar australianu millaun 27, (iha tinan 2020 dolar australianu millaun 7 no iha tinan 2021 dolar australianu millaun 20), Governu Austrália deside hodi oferese tan dolar australianu millaun 20 (kuaze dolar amerikanu millaun 14) ba tinan 2023, nune’e montante totál hamutuk dolar australianu millaun 47.

Husi dolar amerikanu millaun 14 ba tinan 2023, dolar amerikanu millaun 4,7 sei kontinua hodi finansia programa PNDS nian no sei distribui ba Suku 452, iha territóriu Timor laran tomak. Orsamentu dolar amerikanu millaun 7,05 sei aloka ba Bolsa da Mãe Jerasaun Foun no dolar amerikanu 870.000 sei aloka ba Programa Mobilidade Laborál, hodi haruka Timoroan sira ba serbisu iha Austrália, inklui apoiu kontínuu ba traballadór Timoroan sira ne’ebé mak fila husi Austrália mai Timor-Leste, atu reintegra iha atividade negósiu no ekonómiku nian.

“Orsamentu ne’e, sei transfere diretamente ba iha Konta Tezouru Estadu Timor-Leste nian ne’ebé jere husi Ministériu Finansas. Ida-ne’e, hatudu sinál konfiansa ne’ebé Governu Austrália fó mai iha sistema Tezouru Timor-Leste no kumpre prinsípiu Polítika Ajuda Esterna Governu Timor-Leste nian iha tinan 2019, Ministru Rui Gomes hatutan.

Serimónia Asinatura Akordu Apoiu Orsamentu Direta Faze III nian ne’e, entre Ministru Finansas, Rui Gomes ho Enkarregadu Negósius Embaixada Austrália nian iha Timor-Leste, John Feakes, realiza iha ámbitu vizita ofisiál ba Dahuluk husi Primeiru-Ministru, Jenerál Taur Matan Ruak ba Austrália, hafoin simu pose nu’udar Primeiru-Ministru, Oitavu Governu Konstitusionál.

Orsamentu ne’e hamutuk ho alokasaun OJE tinan 2023 nian, ba programa PNDS (dolar amerikanu millaun 23) no BdMJF (dolar amerikanu millaun 19,2) sei ajuda Governu Timor-Leste hodi alkansa nia kompromisu globál, relasiona ho empregu inklui alkansa Objetivu Dezenvolvimentu Sustentavel númeru 8 (Traballu Dignu no Kreximentu Ekonómiku) no númeru 5 (Igualdade Jéneru) husi Ajenda Dezenvolvimentu Sustentavel, tinan 2030 nian.