Primeiru-Ministru, Taur Matan Ruak, iha loron 9 fulan-fevereiru tinan 2023, hala’o sorumutuk ida ho Prokuradór-Jerál Austrália nian, Mark Dreyfus, hala’o iha Kámara Reprezentante sira (Parlamentu Australianu) nian, iha Sidade Canberra, Territóriu Kapitál Austrália nian, iha ámbitu husi ninia vizita ofisiál ba país ida-ne’e.

Sorumutuk ne’e konta ho prezensa husi Ministra Negósius Estranjeirus no Kooperasaun timorense, Adaljiza Magno, Embaixadora Timor-Leste iha Canberra, Inês Almeida no Embaixadór Austrália nian iha Timor-Leste, Bill Costello.

Durante sorumutuk ne’e aborda progresu sira ne’ebé alkansa ona iha ámbitu parseria estratéjika kooperasaun ba setór seguransa nian, ko’alia kona-ba kestaun seguransa marítima, kombate ba krime transnasionál (inklui imigrasaun ilegál, kontrabandu ba merkadoria no estupefasiente, peska ilegál, no seluk tan) no renovasaun ba Programa Dezenvolvimentu Polísia Nasionál Timor-Leste (PNTL), ne’ebé koñesidu hanesan TLPDP.

Primeiru-Ministru, nu’udar Ministru Interiór, aproveita biban ne’e hodi agradese mós ba apoiu ne’ebé hetan iha setór defeza no seguransa, iha tinan rua-nulu ikus ne’e, liuliu durante mandatu Governu Konstitusionál VIII nian, iha ne’ebé, durante ne’e konsege atinje ona rezultadu ne’ebé pozitivu tebes iha dezenvolvimentu infraestrutura, iha kapasitasaun rekursus umanus no, ho doasaun ekipamentu fundamentál sira, iha ne’ebé destaka, entrega ró patrulla nian rua ba PNTL.