Primeiru-Ministru, Taur Matan Ruak, iha loron 9 fulan-fevereiru tinan 2023, partisipa iha han-dadeer, ne’ebé organiza husi Vise-Prezidente Kámara Reprezentante sira (Parlamentu Australianu) nian, Sharon Catherine Claydon, ho Deputadu membru sira husi Grupu Amizade ho Timor-Leste.

Han-dadeer ne’e hala’o iha instalasaun ne’ebé dedika ba Presidente Parlamentu Australianu (Kámara Reprezentante), iha sidade Canberra, Territóriu Kapitál Austrália nian, iha ámbitu vizita ofisiál Xefe Governu Timor-Leste nian ba país ida-ne’e.

Eventu ne’e sura ho prezensa husi Ministra Negósius Estranjeirus no Kooperasaun Timorense, Adaljiza Magno, Embaixadora Timor-Leste iha Camberra, Inês Almeida, Embaixadór Austrália nian iha Timor-Leste, Bill Costelo no membru delegasaun nasionál sira seluk.

Maske sorumutuk plenária Kámara Reprezentante sira nian hala’o iha tempu hanesan, deputadu sira balun, inklui Prezidente hosi Kámara Reprezentante, Milton Dick, deside hodi marka prezensa no durante pauza serbisu plenáriu nian, mai hodi tranzmite apoiu kontínuu hosi deputadu sira grupu ida-ne’e nian, ba Timor-Leste nia dezenvolvimentu nasionál, ho mensiona katak kauza ida-ne’e hetan apoiu husi partidu oioin iha parlamentu, inklui partidu opozisaun sira.