Ministru Saúde no Vise-Ministru Saúde, Bonifácio Mau Coli dos Reis no Komandante Almirante John C. Aquilino, husi Komandu Indo-Pasífiku Estadus Unidus nian (USINDOPACOM, akrónimu iha inglés), lansa Unidade Kuidadu Intensivu Móvel ida (UCI – Akrónimu iha lian portugeza), iha Hospital Nacional Guido Valadares, iha loron 2 fulan-fevereiru tinan 2023.
Unidade Kuidadu Intensivu Móvel ida-ne’e, nu’udar kontribuisaun ida hosi Komandu Indo-Pasífiku Estadus Unidus nian, iha kooperasaun ho Ajénsia Estadus Unidus ba Dezenvolvimentu Internasionál (USAID).
Unidade móvel foun ne’e iha kama sia (9) no teknolojia saúde moderna atu fornese kuidadu saúde ho kualidade aas. Ho instalasaun foun sira ne’e, Hospital Nacional Guido Valadares daudaun ne’e iha kapasidade boot liu 150% hodi hatán ba kuidadu emerjénsia.
Vise-Ministru Bonifácio dos Reis hateten katak, “ha’u lori Ministériu Saúde no Governu Konstitusionál VIII nia naran, hato’o sentidu no agradesimentu ne’ebé kle’an ba apoiu no kooperasaun ne’ebé oferese husi Governu Estadus Unidus Amérika, liuhusi Embaixada Amérika nian iha Timor-Leste, hamutuk ho USINDOPACOM, ne’ebé iha kolaborasaun ho USAID, fornese ona UCI Móvel ida-ne’e”.
Governante ne’e afirma katak, “Ministériu Saúde konsidera no rekoñese importánsia hosi kolaborasaun no kooperasaun mútua ho parseiru dezenvolvimentu sira, parte interesada hotu, ajénsia Nasoins Unidas, ajénsia doadór sira hodi alkansa vizaun, misaun no meta sira ne’ebé define ona iha edisaun daruak Planu Estratéjiku Dezenvolvimentu Nasionál nian iha Setór Saúde, ba períodu tinan 2020 to’o 2030”.
“Ho apoiu ida-ne’e, ho espasu no ekipamentu sira-ne’e, ita bele hasa’e ezijénsia ba ita-nia kuidadu emerjénsia no ita-nia pesoál saúde iha unidade ida-ne’e bele halo sira-nia serbisu ho profisionalizmu liután”, hatutan Bonifácio dos Reis.
Serimónia lansamentu ne’e konta mós ho partisipasaun husi Enkarregadu Negósius husi Embaixada Estadus Unidus Amérika iha Timor-Leste, Thomas Daley no Diretora husi Misaun USAID iha Timor-Leste, Zema Semunegus, no konvidadu sira seluk.