Iha ninia deslokasaun ba iha Sub-distritu Soibada, Distritu Manatuto hodi hala’o konsulta públiku kona-ba Planu Estratéjiku Dezenvolvimentu Nasionál (PEDN) Primeiru-Ministru, Xanana Gusmao, hateten: “Nossa Senhora Aitara hanesan Fatin Peregrinasaun Internasionál, maibé atu atrai turista hosi rai-liur presiza estrada ne’ebé di’ak, eletrisidade, bee-mos, rede komunikasaun, saúde, no edukasaun ne’ebé di’ak.”

Primeiru-Ministru hateten ne’e hafoin rona relatóriu badak ne’ebé aprezenta husi Administradór Sub-distritu Soibada, Francisco da Costa, kona-ba kondisaun Soibada nian. Maske enfrenta difikuldade oin-oin, povu sempre moris ho disiplina no laiha violénsia, nomos administradór hato’o nia agradesimentu ba programa no projetu lubuk ida ne’ebé realiza ona iha Sub-distritu Soibada hahú hosi tinan 2008 to’o agora hanesan, programa PDL, rehabilitasaun estrada, saneamentu públiku, kanalizasaun bee-mos, istalasaun eletrisidade ba Aitara tutun, fornese jeradór eletrika seluk tan.

Iha deslokasaun ne’e Primeiru-Ministru akompaña hosi Vise-Ministru Infrasestrutura, José Manuel Carrascalão, Sekretáriu Estadu Seguransa, Francisco Guteres, no Diretór Jerál Finansas Estadu, Ministériu Finansas, Francisco Burlaco.

Hafoin remata vizita hodi halo konsulta kona-ba PEDN ba dala 33 iha Soibada, iha loron 24 fulan Maiu, Primeiru-Ministru ho ninia komitiva akompaña hosi populasaun Soibada ba hatudu fatin atu harii ponte mota Bua-Rahun.