Ministru Obras Públikas, Abel da Silva, iha loron 13 fulan-janeiru tinan 2023, inaugura sistema abastesimentu bee moos iha Suku Lela no Hatu, iha aldeia Holpilat, Postu Administrativu Mauqatar no asesu ba eletrisidade iha suku Laen-Tolu no Weboot, iha aldeia Suai-Loro, Postu Administrativu Suai, projetu rua ne’e iha Munisípiu Kovalima.

Iha inaugurasaun sistema abastesimentu bee moos iha Mauqatar, Ministru akompaña husi Prezidente Bee Timor-Leste (BTL), Carlos Peloi dos Reis no husi Sekretáriu Jerál Cruz Vermelha Timor-Leste (CVTL – Sigla iha lian portugés), Luís Pedro Pinto no inaugurasaun asesu ba eletrisidade iha Suai akompaña husi Vise-Prezidente EDTL, E.P., Humberto Pereira.

Projetu abastesimentu bee ne’e sei fó benefísiu ba família uma-kain hamutuk 134, ho totál ema na’in-617 no sei permite mós hodi fornese ba postu Unidade Polísia Fronteira (UPF) iha aldeia Lela no Bora, ne’ebé lokaliza iha fronteira aldeia refere. Suai-Loro iha família 50 resin mak hetan ona asesu ba eletrisidade. 

Durante serimónia inaugurasaun, Ministru Obras Públikas manifesta ninia “satisfasaun ba komunidade sira ne’ebé hetan ona asesu ba bee moos no eletrisidade” no hatutan “mensajen Primeiru-Ministru, Taur Matan Ruak nian ida, ne’ebé husu ba komunidade no dirijente lokál sira atu kuida didi’ak instalasaun sira-ne’e hodi bele uza ba tempu naruk”.

 Iha amensajen ne’e mós husu ba komunidade Holpilat atu “uza bee ho kuidadu, tuir sira-nia nesesidade”, nune’e bele “kontribui ba manutensaun instalasaun hirak-ne’e, atu nune’e komunidade bele aproveita hodi asesu ba bee moos ida ho durasaun tempu naruk, tanba bee moos esensiál ba komunidade nia moris loroloron”.

Governante ne’e esplika katak “projetu abastesimentu bee moos hahú iha suku Lela no Hatu, hetan apoiu husi Embaixada Koreia”, no hafoin “orsamentu ne’e kompleta husi CVTL”, no informa mós katak hala’o hela projetu abastesimentu bee moos iha parte sira seluk país nian, no sei inaugura mós iha tempu besik. Durante serimónia ne’e, entrega mós ba komunidade ekipamentu manutensaun instalasaun nian, karik akontese avaria iha sistema abastesimentu nian.

Vise-Prezidente EDTL fó sai katak “komunidade sira ne’ebé foin hetan asesu ba eletrisidade, liuliu hosi aldeia Laen-Tolu no Weboot, sei bele uza eletrisidade ho gratuita durante fulan neen. Hafoin períodu ida-ne’e sei instala kontadór pré-pagu atu komunidade sira bele hahú kontribui ba reseita Estadu nian, liuliu atu sosa kombustivel ba funsionamentu Sentrál Hera no Betanu nian”.

To’o fulan-dezembru tinan 2022 nia rohan, EDTL instala ona enerjia elétrika ba família hamutuk 4. 322 iha aldeia 66, ne’ebé instala ona liña média tensaun hamutuk 139,12 km no liña baixa tensaun hamutuk 180 km, aleinde ne’e instala ona besi-riin ho transformadór hamutuk 30.