Ministru Prezidénsia Konsellu Ministrus, Fidelis Manuel Leite Magalhães, horiseik, loron 19 fulan-janeiru tinan 2023, partisipa iha lansamentu ba relatóriu peskiza kona-ba “envolvimentu sosiedade sivíl nian iha área polítika fiskál no diversifikasaun ekonómika”, ne’ebé hala’o iha sentru rekursus no defeza Oxfam Timor-Leste.

Peskiza ida-ne’e, finansia no prodús ona husi Oxfam Timor-Leste, nia objetivu atu analiza no hatene kna’ar ne’ebé hala’o ona husi sosiedade sivíl iha área polítika fiskál no diversifikasaun ekonómika no mós fornese dadus ne’ebé bele sai hanesan baze informasaun ba Governu, organizasaun sosiedade sivíl no parseiru dezenvolvimentu sira, hodi hametin kna’ar organizasaun sosiedade sivíl sira nian iha prosesu formulasaun polítika públika. 

Iha ninia intervensaun, Ministru Fidelis afirma katak “sosiedade sivíl ne’e maka parseiru importante ida iha prosesu dezenvolvimentu”, “ne’ebé hala’o kna’ar importante ida hodi fornese rekomendasaun espesifika sira ne’ebé apoia iha foti desizaun ba rezolusaun problema nasionál sira”.

Fidelis Magalhães, hatutan katak “partisipasaun hosi sosiedade sivíl no populasaun ein jerál iha prosesu polítiku ne’e hanesan direitu fundamentál ida ne’ebé proteje ona husi ita-nia Konstituisaun” ne’ebé hateten katak “Governu rekoñese valór no dignidade ema ida-idak nian no dezeja katak organizasaun sosiedade sivíl sira sai hanesan veíkulu hodi reprezenta sira-nia interese no nesesidade lejítima sira ho adekuada”.

Na’i-ulun ne’e mós hateten “vontade Governu nian hodi hadi’a mekanizmu konsulta”, liuliu ho “kriasaun ba mekanizmu ida ne’ebé bele simu rekomendasaun husi populasaun no organizasaun sosiedade sivíl sira iha prosesu ba produsaun projetu lei sira molok hetan aprovasaun”.

Ministru Prezidénsia Konsellu Ministrus fó hanoin katak “iha ambiente atuál, nasaun ne’e presiza medida sira ne’ebé promove kreximentu ne’ebé ho objetivu atu apoia kapasidade produtivu sira no kreximentu ne’ebé lidera husi setór privadu iha agronegósiu, turizmu, dijitalizasaun, no setór sira seluk”.

Nia mós iha hanoin “presiza urjente hodi transforma estruturál ida hodi alkansa diversifikasaun ekonómika no hamenus dependénsia ba mina”, ida ne’ebé “importante atu labele trava kreximentu ne’ebé garante empregu ho remunerasaun di’ak/selu ho saláriu di’ak, moris ida ne’ebé adekuada no hadi’a ho substansiál perspetiva jerasaun aban-bainrua nian.

Eventu ne’e konta mós ho diskursu abertura, husi Diretór Nasionál Oxfam Timor-Leste nian, Fausto Belo Ximenes no ho aprezentasaun no diskusaun ba rezultadu prinsipál sira peskiza nian.