Timor-Leste lamenta ho Papa Eméritu Bento XVI nia mate
Prezidénsia Konsellu Ministrus
VIII Governu Konstitusionál
...........................................................................................................................
loron 1, fulan-janeiru, tinan 2023
Komunikadu Imprensa
Timor-Leste lamenta ho Papa Eméritu Bento XVI nia mate
Ho laran triste tebes Governu Timor-Leste simu notísia kona-ba Papa Eméritu Bento XVI nia mate, horiseik, iha loron 31 fulan-dezembru tinan 2022, iha Vatikanu ho idade 95.
Joseph Aloisius Ratzinger, moris iha loron 16 fulan-abríl tinan 1927, nu’udar Papa Igreja Katólika no Bispu Roma nian iha loron 19 fulan-abril tinan 2005 to’o loron 28 fulan-fevereiru tinan 2013, loron ne’ebé ofisializa ninia abdikasaun, hodi sai nu’udar Papa Eméritu no Romanu Pontífise Eméritu ba Igreja Katólika.
Iha fulan-janeiru tinan 2008, Papa Bento XVI simu audiénsia iha Vatikanu, Prezidente Repúblika Timor-Leste, José Ramos Horta.
Papa Bento XVI, iha tinan 2010 harii Sirkunskrisaun Ekleziástika foun ida iha Timor-Leste, hodi kria Dioseze Maliana no hili ninia Bispu Dahuluk Reverendísimu Señór Dom Norberto Amaral.
Primeiru-Ministru, Taur Matan Ruak, lori Governu no Povu timoroan nia naran hato’o sentidas kondolénsias ba família, Santa Sé no Igreja Katólika tomak.
Portavós Governu Konstitusionál VIII nian, Ministru Fidelis Magalhães, salienta katak ninia legadu sei moris no grava nafatin iha memória ema hotu nian iha mundu tomak. REMATA
