Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Toleránsia pontu iha loron 2 fulan-janeiru tinan 2023

Ho konsiderasaun katak iha loron 31 fulan-dezembru tinan 2022 no loron 1 fulan-janeiru tinan 2023, iha loron rua ne’e, sei selebra Loron Eroi Nasionál no Loron Tinan Foun nian.

Ho konsiderasaun katak loron sira-ne’e prevee nu’udar loron feriadu nasionál ho data fiksa iha Lei n.10/2005, loron 10 fulan-agostu, ne’ebé altera husi Lei n. 3/2016, loron 25 fulan-maiu;

Ho konsiderasaun katak loron tuirmai iha loron 31 fulan-dezembru no loron 1 fulan-janeiru, ida-idak sei monu iha, loron sábadu no domingu, nune’e limita tempu ba preparasaun festividade ne’ebé inerente;

Ho konsiderasaun katak ema ho númeru ne’ebé boot sei dezloka ba sira-nia rai moris-fatin durante períodu ne’e, atu partisipa iha loron importante sira ne’e.

Ho konsiderasaun katak eventu sira ne’ebé temi ona sai hanesan loron ne’ebé importante tebes no iha signifikadu sosiál, sai hanesan loron ikus tinan nian atu hanoin-hikas no fó omenajen ba lider istóriku Nicolau Lobato, ne’ebé maka mate iha funu, no kombatente sira seluk hotu ne’ebé maka fó sira-nia moris ba luta libertasaun nasionál;

Nune’e, bazeia ba dispostu iha alínea d) husi n. 6 artigu 7 Lei n. 10/2005, loron 10 fulan-agostu, altera husi Lei n. 3/2016, loron 25 fulan-maiu, Governu determina tuirmai ne’e:

1.    Fó toleránsia pontu iha loron 2 fulan-janeiru tinan 2023;

2.    Despaxu ida-ne’e abranje funsionáriu, ajente no traballadór sira hotu ne’ebé hala’o atividade iha servisu sira administrasaun direta Estadu nian, tantu servisu sentrál ka deskonsentradu sira, no mós iha organizmu sira administrasaun indireta Estadu nian;

3.    La inklui ho númeru anteriór rekursus umanus husi servisu públiku sira, tanba natureza husi atividade sira ne’ebé sira dezenvolve, tenke hala’o nafatin serbisu durante períodu ne’e;

4.    Sein prejuízu ba kontinuidade no kualidade hosi servisu públiku ne’ebé mak atu presta, dirijente másimu sira husi servisu sira ne’ebé temi ona iha númeru anteriór tenke fó dispensa kona-ba devér asiduidade nian ne’ebé hanesan ba funsionáriu sira ne’e, iha loron ne’ebé sei determina bazeia ba oportunidade. REMATA