……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 14 fulan-dezembru tinan 2022
Konsellu Ministrus hala’o sorumutuk iha Palásiu Governu, iha Dili, no aprova projetu Dekretu-Lei, ne’ebé aprezenta husi Ministru Justisa, Tiago Amaral Sarmento, ba alterasaun datoluk ba Dekretu-Lei n. 10/2019, loron 14 fulan-juñu, ne’ebé altera husi dekretu-lei sira n. 46/2020, loron 7 fulan-outubru no n. 10/2020, loron 25 fulan-marsu, ne’ebé aprova ona orgánika Ministériu Justisa nian no ba alterasaun dahuluk ba Dekretu-Lei n. 9/2021, loron 30 fulan-juñu.
Ho alterasaun ida-ne’e, atuál Diresaun-Jerál Administrasaun no Polítika Justisa fahe ba rua, Diresaun-Jerál Polítika Justisa no Diresaun-Jerál Administrasaun.
Halo integrasaun ba armonizasaun estrutura orgánika Ministériu Justisa nian ho diploma sira ne’ebé kria ona ba Komisaun Luta Hasoru Tráfiku Ema no Komisaun Terras no Propriedades.
Altera mós Dekretu-Lei n. 9/2021, loron 30 fulan-juñu, kona-ba Komisaun Luta Kontra Tráfiku Ema nian, hodi altera ninia kompozisaun.
….
Aprova mós projetu Dekretu-Lei, ne’ebé aprezenta husi Ministru Finansas, Rui Augusto Gomes, ba kriasaun Institutu Nasionál Estatístika Timor-Leste, I.P. (INETL) no aprova ninia estatutu ida-idak.
Objetivu husi diploma ne’e, iha ámbitu reforma jestaun finansas públikas nian ne’ebé daudaun ne’e lao hela, atu aumenta kapasidade jestaun no autonomia téknika no administrativa autoridade estatístika nasionál, ne’ebé transforma Diresaun-Jerál Estatístika iha Institutu Nasionál Estatístika Timor-Leste hodi hadi’a kualidade, imparsialidade no konfiansa iha estatístika ofisiál sira Estadu nian.
INETL sei sai ema koletiva públika ida, ho forma institutu públiku, ne’ebé integra iha administrasaqun indireta Estadu nian, iha ámbitu Ministériu Finansas nian, dota ona autonomia téknika, administrativa, finanseira, no patrimóniu rasik.
Institutu Públiku ida-ne’e sei assume knaar nu’udar autoridade estatístika nasionál no ninia misaun maka atu halo dezeñu, koordenasaun no produsaun ba estatístika ofisiál sira Estadu nian.
….
Aprezenta hanesan husi Ministru Finansas, aprova ona projetu Dekretu Governu ba alterasaun dahuluk ba Dekretu Governu n. 13/2022, loron 18 fulan-janeiru, Ezekusaun Orsamentu Jerál Estadu (OJE) ba tinan 2022.
Nune’e, objetivu mak atu permite pagamentu adiantadu husi porsentu 20 liu husi valór kontratu nian, liuhusi utilizasaun dotasaun ne’ebé prevee ona iha OJE 2022. Presiza nafatin aprezentasaun garantia bankária nian ho valór hanesan no aprovasaun husi Ministru Finansas.
Medida be’e sei permite hodi evita kriasaun dívida nian sira no hodi rezolve situasaun kontratu ne’ebé ninia despeza prevee iha OJE tinan 2022, maibé tanba atrazu iha konkluzaun, seidauk bele halo pagamentu no mós seidauk bele halo bazeia ba OJE 2023.
….
Konsellu Ministrus aprova projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, ba kriasaun Muzeu Nasionál Timor-Leste.
Muzeu Nasionál sei responsavel hodi estuda no investiga, inkorpora, inventaria no dokumenta, konzerva, garante seguransa, interpreta, espor no eduka relativa ho sasan kultura sira ne’ebé reprezenta testamuña materiál ho valór sivilizasaun ka kultura timór nian.
Institutu Públiku ne’e tenke promove espozisaun sasan kiltura sira ne’ebé hamutuk ona iha aservu Muzeum Nasionál no entidade sira seluk, públika ka provada, nasionál ka internasionál. Ne’e mós tenke promove funsaun edukativa ne’ebé respeita ba diversidade kulturál, ho objetivu ba edukasaun permanente, partisipasaun komunidade no aumentu diversifikasaun públiku nian sira. Ne’e mós iha kompeténsia hodi promove direitu ba kultura no ba fruisaun kulturál, nomós promosaun, difuzaun no valorizasaun patrimóniu kulturál Timor-Leste, ba nivel nasionál no internasionál.
….
Ikusliu, aprova projetu Rezolusaun Governu, ne’ebé mós aprezenta husi Ministru Ensinu Superiór, Longuinhos dos Santos, ba nomeasaun Membru Konsellu Jerál Universidade Nasionál Timor Lorosa’e ne’ebé kompeténsia Konsellu Ministrus nian.
Nune’e, Konsellu Ministrus deside hodi nomea Ministru Edukasaun, Juventude no Desportu, Armindo Maia, ninia lejítimu reprezentante, hanesan membru Konsellu Jerál UNTL nian reprezenta Governu.
Nia mós Nomeia hanesan membru Konsellu Jerál UNTL, Señór Padre Acácio Domingos de Castro, o Dr. José António Gusmão Guterres no Señór João Baptista Fernando Alves, hanesan Prezidente Konsellu Jerál UNTL. REMATA