Sorumutuk Estraordináriu Konsellu Ministrus nian iha loron 12 fulan-dezembru tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Estraordináriu Konsellu Ministrus nian iha loron 12 fulan-dezembru tinan 2022
Konsellu Ministrus hala’o sorumutuk iha Palásiu Governu, iha Dili no aprova ona alterasaun ida ba diploma ne’ebé aprova husi Konsellu Ministrus iha sorumutuk husi loron 9 fulan-novembru tinan 2022, kona-ba pagamentu estraordináriu ba saláriu adisionál fulan ida nian.
Hafoin rona no simu komunikasaun husi Sua Exelénsia Prezidente Repúblika, Konsellu Ministrus ohin aprova ona alterasaun ida, ne’ebé ein jerál mantein prinsípiu universalidade diploma inisiál nian iha loron 9 fulan-novembru, hodi inklui kontratadu sira hotu, la haree ba nasionál ka internasionál.
Valór hosi pagamentu estraordináriu, ekivale ho valór saláriu mensál benefisiáriu nian, iha fulan-dezembru tinan 2022. Maibé, hodi uniformiza valór pagamentu estraordináriu nian entre traballadór sira iha Administrasaun Públika, estabelese limite sira hodi armoniza ho rejime jerál. Ho nune’e, pagamentu ba traballadór sira Administrasaun Públika nian, nasionál ka estranjeiru, ne’e limitadu ba valór grau no eskalaun másimu tabela salariál nian hosi karreira rejime jerál ka ba valór vensimentu hosi ajente Administrasaun Públika ne’ebé kontrata ona ba ezersísiu kargu diretór-jerál nian. REMATA
