……………………………………………………………………………………………………………
loron 3, fulan-dezembru, tinan 2022
Komunikadu Imprensa
Votu Pezar ba Jill Jolliffe nia mate
Ho laran triste tebes no sentimentu ne’ebé kle’an, bainhira Governu Repúblika Demokrátika Timor-Leste simu notísia kona-ba Jill Jolliffe, jornalista australiana nia mate, ne’ebé dedika nia vida tomak hodi akompaña luta ba libertasaun nasionál Timor-Leste nian.
Jill Jolliffe mate horiseik, iha loron 2 fulan-dezembru, tanba insufisiénsia kardíaka (fuan).
Jornalista ne’e asiste atake dahuluk tropa indonézia nian iha Timor-Leste iha fulan-setembru tinan 1975 no relata jornalista na’in-lima nia mate iha Balibo.
Iha tinan 1978, nia publika ninia livru dahuluk “East Timor: Nationalism and Colonialism”.
Iha tinan 1994, nia tama ba foho Timor-Leste mai hosi Indonézia hodi buka lider funu-na’in Nino Konis Santana. Nia hetan kaptura husi militár indonéziu sira, maibé, maske nune’e, nia konsege konklui ninia dokumentáriu “Blackade”.
Iha tinan 1998, nia simu Logie Award husi dokumentáriu “Death in Balibo”, kona-ba jornalista na’in-lima nia mate iha Balibo.
Nia nu’udar korrespondente ba Nation Review, Reuters, The Guardian, The Sunday Times, The Age, Sydney Morning Herald no ba BBC.
Iha loron 20 fulan-setembru tinan 2014, nia simu kondekorasaun ho Medalla Orden Solidariedade Timor-Leste nian, hanesan símbolu gratidaun no agradesimentu ba ninia kontributu iha luta timoroan nian.
Primeiru-Ministru, Taur Matan Ruak, lori povu timoroan tomak nia naran, hato’o ninia “Kondolénsia ba família Jill Jolliffe no agradesimentu husi nasaun ida ne’ebé sempre agradese”.
Portavós Governu nian, Ministru Fidelis Magalhães, afirma katak, Timor-Leste sei la haluha Jill Jolliffe no sei hanoin nafatin ho domin boot, admirasaun no respeitu. Iha momentu triste ida-ne’e, ami lamenta ho ninia mate, maibé ami selebra ninia kontributu. REMATA