Iha loron 30 fulan-novembru tinan 2022, Primeiru-Ministru, Taur Matan Ruak no Prezidente Repúblika, José Ramos Horta, ofisialmente hala’o inaugurasaun ba Portu Baía Tibar, projetu parseria-privada dahuluk (PPP) iha nasaun ne’e.

Portu Baía Tibar foun no modernu, ne’ebé substitui Portu Dili, portu ne’e harii hanesan PPP entre Governu Timor-Leste, ne’ebé kontribui dolar millaun 130, liuhusi Viability Gap Fund (VGF) no Timor-Port, subsidiária Balloré nian, ne’ebé investe ona dolar millaun 150. Tanba ne’e, valór totál husi faze inisiál maka millaun US$ 280, investimentu totál ida ne’ebé prevee millaun US$ 500, durante tinan 30.

Portu komersiál foun ne’e, harii husi China Harbour Engineering Company, empreza estatál Xineza ida, ne’ebé sei permite hodi hadi’a konektividade marítima Timor-Leste nian iha rejiaun Ázia no Pasífiku, liga Timor-Leste ba merkadu komersiál globál no sei aumenta asesu komersiál nasaun nian ba merkadu iha área hanesan agrikultura, turizmu, peska, pekuária no indústria sira seluk – ne’e hanesan dalan ida hodi permite Timor-Leste atu diversifika ninia produsaun.