Prezidénsia Konsellu Ministrus

VIII Governu Konstitusionál

……………………………………………………………………………………………………………

Komunikadu Imprensa

Governu hato’o ninia solidariedade ba Indonézia

Governu Timor-Leste hato’o ninia sentidu kondolénsia ba Governu no povu Repúblika Indonézia nian tanba rai-nakdoko, ho magnitude 5,6 iha eskala Richter, ne’ebé akontese iha illa Java Indonézia, iha segunda-feira semana kotuk, loron 21 fulan-novembru.

Tuir balansu ikus husi autoridade Indonézia, pelumenus ema 310 mak mate, ema 24 maka seidauk hetan, ema 2.000 resin maka kanek, kuaze uma 56.000 mak hetan estragu no ema 62.000 resin maka lakon sira-nia hela-fatin.

Primeiru-Ministru, Taur Matan Ruak, espresa sentidu kondolénsia ba família vítima sira no hato’o nia solidariedade ho Governu no povu indonéziu tanba dezastre naturál ida-ne’e.

Portavós Governu Konstitusionál VIII nian, Ministru Fidelis Manuel Leite Magalhães, afirma katak, “ami-nia sentimentu ba família sira ne’ebé lakon ema ne’ebé sira hadomi no ami-nia hakru’uk ba sira ne’ebé nafatin determinadu hodi buka vítima sira ne’ebé sei moris no hodi apoia populasaun sira ne’ebé afeta hosi katástrofe ida-ne’e”. REMATA