……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 16 fulan-novembru tinan 2022
Konsellu Ministrus hala’o sorumutuk iha Palásiu Governu, iha Dili, no aprova ona projetu Rezolusaun Governu kona-ba abertura área sira atu hala’o atividade mineira sira no aprovasaun termu referénsia sira ba konkursu hodi atribui direitu mineiru ba esplorasaun no produsaun materiál sira konstrusaun nian iha área tolu konsesaun nian, ne’ebé aprezenta husi Ministru Petróleu no Minerais, Víctor da Conceição Soares.
Nune ‘e, Governu halo abertura ba área sira iha territóriu nasionál, hodi hala’o atividade mineira sira, ne’ebé klasifika hanesan indústria minerál, iha kategoria materiál konstrusaun nian, no hodi konsidera restrisaun sira ne’ebé prevee iha Kódigu Mineiru nian.
Halo mós aprovasaun termu referénsia ba abertura konkursu hodi atribui direitu mineiru sira ba esplorasaun no produsaun materiál konstrusaun iha área tolu konsesaun nian ne’ebé define ona – mota Loes, mota Laklo no mota Laleia.
.
Aprova mós projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, ne’ebé halo alterasaun dahaat ba Dekretu-Lei n. 8/2013, loron 26 fulan-juñu, kona-ba Rejime Jerál Programa Nasionál Dezenvolvimentu Suku sira, alterasaun datoluk ba Dekretu-Lei n. 11/2019, loron 14 fulan-juñu, Orgánika Ministériu Administrasaun Estatál nian, alterasaun dahaat ba Dekretu-Lei n. 3/2016, loron 16 fulan-marsu, alterasaun dahuluk ba Dekretu-Lei n. 4/2022, loron 12 fulan-janeiru no alterasaun Dahuluk ba Dekretu-Lei n. 25/2022, loron 19 fulan-maiu, Programa Uma ba Ema Kbiit Laek Plus.
Ho kreximentu PNDS nian, liuliu, ne’ebé rezulta husi integrasaun susesiva husi “programa” foun no programa oioin iha ninia katálogu projetu no atividade sira, presiza modifika no hadi’a bele iha estrutura organizasionál apoiu ba programa PNDS nian, no mós iha kritériu, prosedimentu no sistema ne’ebé regula apoiu sira ne’ebé fó ba projetu infraestrutura ho interese koletivu (PNDS), hodi atribui abitasaun sosiál (UKL) no hodi distribui materiál konstrusaun nian (UKL+), apoiu sira ne’ebé daudaun ne’e regula husi kritériu autónomu hodi identifika no selesiona benefisiáriu sira, prosedimentu ne’ebé lahanesan, no fahe responsabilidade no funsaun sira ne’ebé la hanesan entre órgaun, servisu no organizmu interveniente sira iha “programa sira” ne’ebé temi ona.
Nune’e, hala’o alterasaun ba Dekretu-Lei n.u 8/2013, loron 26 fulan-juñu, ho objetivu atu define no konsolida lejizlativamente regra sira ne’ebé regula hodi atribui apoiu sira ne’ebé Estadu fó iha ámbitu PNDS. Remata