Governu timoroan hato’o parabéns ba Prezidente eleitu Brazíl nian
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Dili, loron 31 fulan-outubru tinan 2022
Governu timorense felisita Prezidente eleitu Brazil nian
Governu Timor-Leste ho laran tomak hato’o parabéns ba Luiz Inácio Lula da Silva tanba eleitu hanesan Prezidente Repúblika Brazíl nian no dezeja ba nia susesu boot hodi hala’o ninia knaar importante sira.
Lula da Silva ba dala tolu eleitu hanesa Prezidente, hafoin ukun Brazíl husi tinan 2003 to’o tinan 2010 no sei simu pose iha loron 1 fulan-janeiru tinan 2023.
Iha fulan-jullu tinan 2008, durante ninia mandatu anteriór, Lula da Silva vizita ona Timor-Leste, hodi hasoru malu ho Xefe Estadu no Governu nasionál sira no vizita mós Parlamentu Nasionál.
Primeiru-Ministru, Taur matan Ruak, haruka ninia votus felisitasaun ba Luiz Inácio Lula da Silva no hato’o “dezeju susesu iha ninia lideransa.”
Xefe Governu ne’e mós hateten nia fiar katak Lula da Silva “sei lori povu brazileiru ba susesu ida ne’ebé boot liután” no “ida-ne’e hanesan vitória boot ida ba povu brazileiru, la’ós de’it tanba hetan lideransa foun ida, maibé mós atu hatudu katak Brazíl hanesan país ida ne’ebé valoriza sistema demokrátiku”.
Portavós Governu Konstitusionál VIII, Ministru Fidelis Magalhães, lori Konsellu Ministrus no Governu tomak nia naran, hato’o esperansa ne’ebé forte katak ho lideransa foun Lula da Silva nian, lasu amizade no kooperasaun entre nasaun rua ne’e sei nafatin metin liután”. REMATA
