Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Dili, loron 26 fulan-outubru tinan 2022

 Toleránsia Pontu iha loron 31 fulan-outubru tinan 2022

Ho konsiderasaun katak iha loron 01 no loron 02 fulan-novembru sei selebra, nu’udar Loron Santu sira Hotu nian no Loron Matebian sira nian;

Ho konsiderasaun katak loron sira-ne’e prevee momós ona iha Lei n. 10/2015, loron 10 fulan-agostu, ne’ebé altera husi Lei n. 3/2016, loron 25 fulan-maiu, nu’udár loron feriadu nasionál;

Ho konsiderasaun katak selebrasaun relijioza sira ne’ebé selebra iha loron hirak ne’e, loron ne’ebé importante tebes no iha signifikadu boot ba sarani katóliku sira ne’ebé baibain partisipa iha loron sira ne’e ho númeru ne’ebé boot;

Ho konsiderasaun katak ema ho númeru ne’ebé boot sei dezloka ba sira-nia rai moris-fatin hodi partisipa iha serimónia relijioza ne’ebé sei hala’o iha ne’ebá;

Ho konsiderasaun katak loron 31 fulan-outubru tinan 2022 sei monu iha loron-segunda no ema barak sei dezloka ba sira-nia rai moris-fatin durante findesemana.

Ho konsiderasaun ba prátika ne’ebé maka molok ne’e halo tuir ona;

Ho konsiderasaun katak, tuir dispostu iha alínea d) husi n. 6 artigu da-7 husi Lei n. 10/2015, loron 10 fulan-agostu, ne’ebé altera husi Lei n. 3/2016, loron 25 fulan-maiu, nu’udar kompeténsia Primeiru-Ministru nian hodi fó toleránsia pontu ba” funsionáriu no ajente nian-sira husi ministériu hotu-hotu ka servisu ne’ebé dependente ba sira, no mós institutu no organizmu sira ne’ebé integra iha administrasaun indireta Estadu nian”;

Nune’e, bazeia ba dispostu iha alínea b) hosi n. 2 no iha alínea d) hosi n. 6, alínea rua ne’e hotu, husi artigu da-7 Lei n. 10/2005, loron 10 fulan-agostu nian, ne’ebé altera husi Lei n. 3/2016, loron 25 fulan-maiu, ha’u determina hanesan tuirmai ne’e:

1. Fó toleránsia pontu iha loron 31 fulan-outubru tinan 2022, loron tomak;
2. Despaxu ida-ne’e inklui funsionáriu, ajente no traballadór sira hotu ne’ebé hala’o knaar iha servisu sira administrasaun direta Estadu nian, tantu sentrál ka deskonsentradu nian-sira, no mós iha organizmu sira administrasaun indireta Estadu nian;
3. La inklui iha númeru anteriór rekursus umanus husi servisu públiku sira ne’ebé, tanba natureza husi atividade ne’ebé sira dezenvolve, tenke hala’o nafatin serbisu durante períodu ne’e;
4. Sein prejuízu ba kontinuidade no kualidade husi servisu públiku ne’ebé atu presta, dirijente másimu sira husi servisu sira ne’ebé temi ona iha númeru anteriór tenke fó dispensa kona-ba devér asiduidade nian ne’ebé hanesan ba funsionáriu sira ne’e, iha loron ne’ebé sei determina bazeia ba oportunidade. REMATA