Hala’o ona semináriu no lansamentu estudu ida “Impaktu migrasaun laborál temporária nian ba moris-di’ak iha Timor-Leste: Avaliasaun ida husi Programa australianu nian ba traballadór sazonál sira (ne’ebé hala’o tuir tempu tinan nian)”, iha loron 7 to’o 8 fulan-outubru tinan 2022, iha edifísiu Diresaun-Jerál Estatístika.

Eventu ne’e organiza husi Sekretaria Estadu Formasaun Profisionál no Empregu (SEFOPE) no hosi Diresaun-Jerál Estatístika, Ministériu Finansas.

Estudu ne’e sei hala’o liuhusi kolaborasaun ida ho tinan tolu ne’ebé finansia husi programa Linkage do Australian Research Council iha parseria ho Governu Timor-Leste, Flinders University, Programa Nasoins Unidas ba Dezenvolvimentu (PNUD), Departamentu Negósius Estranjeirus no Komérsiu husi Governu Austrália (DFAT) no programa PROSIVU.

Estudu ida-ne’e ho ninia objetivu atu buka-hatene impaktu sira programa traballadór sazonál sira husi Austrália no programa migrasaun temporáriu serbisu Koreia Súl nian, Employment Permit System, no moris-di’ak traballadór migrante nian no sira-nia família sira iha Timor-Leste. Dadus sira ne’ebé hatudu husi estudu ne’e sei esklarese utilizasaun kona-ba haruka osan mai Timor-Leste no kompeténsia sira husi família traballadór sira nian ne’ebé simu ona osan hodi sai hanesan baze polítika ba hatutan-moris lokál ne’ebé sustentavel iha mundu ida pós-COVID-19 ho limitasaun viajen ne’ebé boot liu.

Tuir dadus SEFOPE nian, timoroan hamutuk 10.906 partisipa ona iha programa sira-ne’e, 6. 156 iha Austrália no iha Koreia Súl hamutuk 4. 750. Husi ema hirak ne’e, besik ema rihun lima maka fila ona mai Timor-Leste. Valór osan ne’ebé haruka ona ba Timor-Leste husikedas tinan 2012 iha montante besik dolar amerikanu millaun 63.

Semináriu ne’e ho objetivu atu hametin kapasidade investigasaun nasionál nian, hodi fó formasaun ne’ebé aplika ba análize dadus kona-ba temátika sira estudu nian.

Eventu ne’e ho partisipasaun husi Vise-Ministru Finansas, António Freitas, Sekretáriu Estadu Formasaun Profisionál no Empregu, Alarico do Rosário, Embaixadór Austrália nian, Bill Costello, ekipa hosi Universidade Flinders, reprezentante sira hosi DFAT, programa PROVISO, PNUD, Organizasaun Internasionál ba Migrasaun, Diretór-Jerál no Diretór Nasionál sira husi SEFOPE no Diresaun-Jerál Estatístika.