……………………………………………………………………………………………………………
Komunikadu Imprensa
Díli, loron 29 fulan-setembru tinan 2022
Votu Pezar ba Bispu Hilton Deakin, Timor-Leste nia belun ida, nia mate
Ho sentimentu ne’ebé kle’an Governu Repúblika Demokrátika Timor-Leste simu notísia katak, Bispu Hilton Deakin fila hikas ona ba Aman Maromak nia Kadunan Santu, nia hanesan defensór boot ida ba direitus umanus no ba autodeterminasaun povu timoroan nian.
Hilton Forrest Deakin, Bispu Ausiliár Eméritu Melbourne nian, mate iha kuarta-feira, loron 28 fulan-setembru tinan 2022, ho idade 89, hafoin moras kleur.
Nia moris iha Seymour, Victoria, Austrália, iha loron 13 fulan-novembru tinan 1932, Bispu Deakin simu ordenasaun saserdotál iha tinan 1958. Iha tinan 1987, nia sai nu’udar Vigáriu Jerál Arkidioseze Melbourne nian no simu ordenasaun hanesan Bispu Ausiliár Melbourne nian iha loron 3 fulan-marsu tinan 1993. Bispu Hilton Deakin reforma iha tinan 2007, ho idade 75, no nomeadu nu’udar Bispu Eméritu.
Durante okupasaun Indonézia, Hilton Deakin, fó kontribuisaun importante ida iha apoiu ba movimentu hodi luta ba autodeterminasaun Timor-Leste nian no fó apoiu ba populasaun Timoroan iha Melbourne.
Hanesan rekoñesimentu hosi ninia apoiu ba Rezisténsia Timor no hosi ninia kontributu ba luta autodeterminasaun nasionál nian, iha tinan 2012, Bispu Hilton Deakin simu distinsaun ho Orden Timor-Leste no ho Orden Dom Martinho Lopes.
Portavós Governu Konstitusionál VIII nian, Ministru Fidelis Magalhães, lori Governu no povu Timor-Leste nia naran, hato’o kondolénsia ba família no amigu sira Bispu Hilton Deakin nian no afirma katak, “ninia lian ne’ebé defende povu Timor no amizade ne’ebé boot no apoiu kontínuu ba luta ita sei la haluha”.
Primeiru-Ministru, Taur Matan Ruak, salienta katak, “ninia asaun sira no kompromisu ne’ebé boot tebes kona-ba direitus umanus, justisa no solidariedade sei rai-nafatin iha ita-nia memória no ita-nia fuan” REMATA