Prezidénsia Konsellu Ministrus

VIII Governu Konstitusionál

……………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 14 fulan-setembru tinan 2022

Konsellu Ministrus hala’o sorumutuk iha Palásiu Governu, iha Dili, no tuir projetu sira ne’ebé aprezenta husi Ministru Obras Públikas, Abel Pires da Silva, delibera ona:

• hodi autoriza prosedimentu aprovizionamentu nian liuhusi konkursu públiku internasionál no realizasaun despeza ba obra públika sira kona-ba reabilitasaun:

1.      estrada husi Manatutu ba Laklo – valór globál ne’ebé prevee maka US$ 8.315.330,44;

2.      estrada husi Aileu (Be’cluru) ba Likidoe Laklo – valór globál ne’ebé prevee maka US$ 25.154.925,51;

3.      estrada husi Alas ba Wedeberek- valór globál ne’ebé prevee maka – US$23.232.296,32;

4.      estrada urbana Maliana nian – Pakote I- valór globál ne’ebé prevee maka US$ 16.314.392,06; no

5.      estrada urbana Maliana nian – Pakote II – estrada prinsipál- valór globál ne’ebé prevee maka US$ 23.587.019,36;

• no hodi aprova prosedimentu kona-ba reabilitasaun estrada sira:

1. seksaun husi Laga ba Bagia – Pakote IV estrada munisipál – ; no

1. seksaun husi Kuelikai ba Ossu- Pakote III estrada munisipál .

 ……

Konsellu Ministru aprova Projetu Proposta Lei Orsamentu Jerál Estadu (OJE) ba tinan 2023, ne’ebé aprezenta husi Ministru Finansas, Rui Augusto Gomes.

Reseita sira Setor Públiku Administrativu nian maka dolar amerikanu 3.156.922.141, no despeza sira Setor Públiku Administrativu nian maka dolar amerikanu 3.155.715.306, inklui Fundu Kombatente Libertasaun Nasionál no orsamentu Seguransa Sosiál no Rejiaun Administrativa Espesiál Oe-Kusi Ambeno (RAEOA) nian. Despeza sira servisu no entidade Administrasaun Sentrál nian ho valór dolar amerikanu millaun rihun 2,8. Despeza sira ne’ebé prevee ba Seguransa Sosiál ho valór dolar amerikanu millaun 235,7 no Rejiaun Administrativa Espesiál Oe-Kusi Ambenu (RAEOA) ho montante dolar amerikanu millaun 120.

La inklui Fundu Kombatente Libertasaun Nasionál, 33% husi orsamentu sei aloka ba kuadru institusionál, 35% ba kapitál sosiál, 11% ba dezenvolvimentu ekonómiku, 18 % ba dezenvolvimentu infraestrutura no 3% ba fundu kontinjénsia.

Projetu ba Proposta Lei ne’e prevee alterasaun balun iha taxa impostu seletivu ba konsumu nian, kompara ho saida maka define iha OJE tinan 2022 nian, hanesan:

• Masin-midar no produtu konfeitaria ba oin sei iha taxa impostu dolar amerikanu 1 ba kilograma ida;
•  Bee ne’ebé kontein masin-midar ka edulkorante (produtu midar sira seluk) ka aromatizada seluk, no bebida sira la ho alkol, exetu sumu ai-fuan ka produtu ortíkola, ba oin sei iha taxa impostu dolar amerikanu 3 ba litru ida;
• Valór taxa impostu atu aplika ba tabaku no produtu sira seluk ne’ebé mai husi tabaku, sa’e husi dolar amerikanu 50 kada kilograma ba dolar amerikanu 100 kada kilograma;
• Karreta sira ne’ebé ninia valór aas liu dolar amerikanu rihun 10, ba oin sei selu taxa impostu porsentu 10, karreta sira ne’ebé ninia valór aas liu dolar amerikanu rihun 25, ba oin sei selu taxa impostu porsentu 25, no karreta sira ne’ebé ninia valór aas liu dolar amerikanu rihun 50 sei selu taxa impostu porsentu 30.

……

Vise-Ministru Negósius Estranjeirus no Kooperasaun, Julião da Silva, halo aprezentasaun ida kona-ba pontu situasaun husi prosesu adezaun Timor-Leste nian ba Asosiasaun Nasoins Sudeste Aziátiku (ASEAN). Durante aprezentasaun, Vise-Ministru informa ba membru Konsellu Ministru kona-ba atividade sira ne’ebé la’o hela no progresu sira ne’ebé alkansa ona no mós asaun sira ne’ebé presiza implementa iha tempu badak no inisiativa lejizlativa sira ne’ebé presiza atu hetan aprovasaun iha tempu badak husi Konsellu Ministrus hodi bele kumpre rekizitu no kompromisu sira adezaun nian ba ASEAN.

……

Ikusliu, Ministru Obras Públikas, Abel Pires da Silva no Prezidente EDTL, Paulo da Silva, aprezenta ba Konsellu Ministrus opsaun sira ba projetu implementasaun ba enerjia renovável sira, tuir estudu viabilidade ne’ebé realiza ona. Halo ona aprezentasaun ba previzaun kustu, prazu, vantajen no dezvantajen sira ba fonte enerjia oin-oin no ba planu implementasaun nian. Ministériu Obras Públikas no EDTL sei fó kontinuidade ba estudu no avaliasaun ba opsaun sira ne’ebé eziste.  REMATA