Iha loron 08 fulan-setembru tinan 2022, Ministru Prezidénsia Konsellu Ministrus, Fidelis Manuel Leite Magalhães, partisipa iha Forum Internasionál Altu Nivel, reprezenta Primeiru-Ministru, Taur Matan Ruak.

Eventu ne’e hala’o iha sala konferénsia City 8 nian, iha Dili ho tema “Konsolidasaun ba Investimentu sira Nutrisaun nian iha Timor-Leste, iha tinan sira dahuluk Moris nian”.

Iha ninia intervensaun, iha abertura eventu ne’e nian, Ministru Fidelis agradese no fó parabéns “ba sira hotu ba inisiativa husi eventu ida-ne’e no ba oportunidade atu partilla informasaun no koñesimentu sira ne’ebé sei ajuda atu hadi’a mós ita-nia servisu iha área Nutrisaun”.

Manifesta mós esperansa no dezeju katak “ iha forum ida-ne’e, sei iha partilla ba lisaun sira hosi kazu susesu internasionál nian, kona-ba mitigasaun ba hamlaha no redusaun efetiva ba Kra’es Badak, sustentável no duradoura (tahan ba tempu naruk), ne’ebé sei sai ezemplu hodi enkoraja mudansa ba ábitu no komportamentu alimentár sira, hodi  introdús iha ita-nia rejime alimentár, produtu lokál, orgániku no biolójiku nian sira, ho valór nutritivu ne’ebé aas no mós, iha tempu hanesan, enkoraja investimentu iha setór agrikultura, pekuária no peskas nian no seluk tan, atu nune’e dezenvolve potensialidade produtiva sira nasaun nian”.

Ministru afirma katak “Governu rekoñese katak seguransa alimentár no nutrisionál, iha ligasaun kle’an ho nesesidade atu halakon moris-kiak no atu hadi’a kondisaun sira moris nian, ne’ebé nu’udar baze fundamentál ida ba dezenvolvimentu nasionál no atu atinje prioridade prinsipál sira”.

Temi mós katak presiza atu “reforsa investimentu, la’ós de’it iha programa sira Seguransa Alimentár nian hanesan Sesta Bázika, maibé mós iha asaun ida ne’ebé hamutuk no Multisetoriál kona-ba Seguransa Nutrisionál, hodi promove divulgasaun, sosializasaun no koñesimentu jerál kona-ba problema ida-ne’e, ho sidadaun, família, autoridade, parseiru no organizasaun, públika no privada sira, ne’ebé integra ita-nia populasaun no komunidade sira”.

Forum internasionál ida-ne’e organiza hosi Gabinete Primeiru-Ministru no Banku Mundiál, no hetan partisipasaun husi membru Governu sira, Parlamentu Nasionál no Korpu Diplomátiku, reprezentante sira organizasaun nian no parseiru dezenvolvimentu sira no espesialista nasionál no estranjeiru sira iha área saúde no nutrisaun nian.