Primeiru-Ministru, Kay Rala Xanana Gusmão ho nia komitiva simu deretamente husi administradór distritu Manufahi, Filomeno Tilman, Administradór sub-distritu Turiscai, Autoridade lokál no povu sub-distritu Turiscai tomak, iha fatin simu Administradór Distritu Manufahi hato’o benvindu ba Sr. S.E. Primeiru-Ministru ho nia komitiva tomak bele to’o iha sub-distritu Turiscai hanesan dahuluk vizita ba área distritu Manufahi nian.

Filomeno Tilman hato’o benvindu ba Sua Exelencia ho nia komitiva, hafoin ne’e simu deretamente husi lia nain akompanha ho sergala no tebedai hodi ba to’o iha fatin konsulta PEDN, antes atu tama ba iha programa konsulta PEDN lia nain sira sei sergala no dadolin se se manu hodi lok Sua Exelencia atu mama malus no fuma tabaku tradisionál Timor-leste ninian.

Hanesan baibain atu taa ba iha konsulta PEDN hodi entrega tempu tomak ba iha Primeiru-Ministru, Kay Rala Xanana Gusmão, dahuluk administradór sub-distritu Turiscai hato’o uluk jeografika sub-distritu nian ba iha Sr.S.E. Primeiru-Ministru ho nia komitiva, katak, sub-distritu Turiscai iha suku walu, Aldeia 45, vida móris lorloron nian mak hanesan agrikultór ba kafe no to’os.

Hafoin ne’e entrega tempu tomak ba iha Sr. Primeiru-Ministru, Kay Rala Xanana Gusmão, atu hato’o esplikasaun kona-ba PEDN ne’ebé mai ho infraestrutura bázika hitu mak hanesan, estrada no ponte, bee mós, eletrisidade, fatin halibur bee, komunikasaun, aeruportu no portu.

Rona tiha esplikasaun hirak ne’e Povu Turiscai, apresenta sira nia preokupasaun katak, Francisco Xavier do Amarál nudar proklamador Timor-Leste nian, maibe to’o ohin loron área Xavier sei ijoladu nafatin no povu nia móris la asesu ba estrada husi Maubessi to’o Turiscai ne’ebé to’o agora la iha alkatraun no sei nafatin hanesan halai natar,eletrisidade, be’e mós no estrada rurais.

Foin rona tiha preokupasaun sira ne’e S.E. Primeiru-Ministru, Kay rala Xanana Gusmão, hatan katak, libertasaun povu tomak hamri’ik hodi kontra nasaun bo’ot no oras no tempu to’o ona atu ita luta ba kontra móris kiak, iha tinan 2011 to’o tinan 2030 ita lakohi atu haree tan ema móris nafatin ho kiak no la asesu ba estrada.

Primeiru-Ministru, Kay Rala Xanana Gusmão, to’o iha Turiscai, distritu Manufahi, povu hulan PM Xanana hodi dehan “ne’e mak ita nia aman ba desenvolvimentu”.

Primeiru-Ministru, Kay Rala Xanana Gusmão, akompanha husi Ministra Finansas, Emília Pires, Sekretáriu Estadu Seguransa, Francisco Guterres, halo konsulta PEDN iha sub-distritu Turiscai, distritu Manufahi, iha loron Sabado liu bá, 15/5/2010.