Ministériu ba Asuntus Parlamentares no Komunikasaun Sosiál (MAPKOMS) fó apoiu nafatin orsamentu Fundu Tranaferénsia Públika ba Sentru Informasaun Suku Rurál (SISR) sira ho montente US$ 14.700,00, kinta-feira ne’e, loron 25 agostu 2022, iha Palásiu Governu, Díli. 

Atribuisaun ba fundu ne’e hosi Diretór Nasionál Diseminasaun Informasaun, Estevão da Costa Belo no Xefe Departamentu Protokolu, Imprensa no Edisaun Online, Carmen Beatriz Ximenes Gonçalves ba Xefe Suku sira hosi Rotuto (Manufahi), José dos Santos, Lisa Dila (Likisá), Fernando Lobo, Lore II (Lautem), Armando de Jesus no Dato Tolu (Kovalima), João Agustinho Resi ne’ebé akompaña hosi Koordenadór no Jestór (SISR) sira no mós tékniku sira iha diresaun ne’e.

Objetivu hosi apoiu ne’e hodi fasilita atividade iha sentru nian tuir proposta ne’ebé submete hosi SISR sira hodi disemina informasaun rurál ba públiku iha meiu sira komunikasaun sosiál nian no imprensa.

Apoiu ne’e hanesan parte polítika ida MAPKOMS nian atu kontribui ba dezenvolvimentu setór komunikasaun sosiál nian tuir programa nasionál garante liberdade imprensa no liberdade espresaun hodi disemina informasaun hotu-hotu ba públiku kona-ba dezenvolvimentu, potensialidade no atualidade iha suku rurál sira.