Ministru Prezidénsia Konsellu Ministrus, Fidelis Manuel Leite Magalhães, hala’o vizita ofisiál ida ba Jakarta, iha Indonézia, hosi loron 18 to’o 24 fulan-agostu tinan 2022. Durante vizita ne’e hala’o ona sorumutuk bilaterál sira ho membru Governu indonézia nian, diplomata sira, parseiru dezenvolvimentu sira, akadémiku no personalidade relevante sira seluk. Hala’o ona palestra no sorumutuk sira iha universidade haat iha Jakarta no mós hetan entrevista hosi CNN indonézia no Detikcom. 

Iha dadeer loron 19 fulan-agostu, Governante ne’e akompaña husi Sekretáriu Estadu Komunikasaun Sosiál, Mericio Juvinal dos Reis “Akara”, halo ona palestra ida iha Universidade Indonézia (UI), kona-ba papél meiu komunikasaun nian ba dezenvolvimentu no demokrasia. Iha lokraik entrevista ona hosi CNN Indonézia, ko’alia kona-ba prosesu adezaun Timor-Leste nian ba ASEAN, kooperasaun no relasaun bilaterál sira entre Indonézia ho Timor-Leste no asuntu multilaterál sira seluk rejiaun nian. Ministru remata loron ne’e ho enkontru ida no resesaun ofisiál ho Embaixadór Timor-Leste nian ba Indonézia, Filomeno Aleixo, ho embaixadór akreditadu sira ba Timor-Leste no embaixadór sira CPLP nian iha Jakarta. Durante sorumutuk ne’e, Fidelis Magalhães fahe vizaun Governu nian ba objetivu sira dezenvolvimentu nasionál no prioridade sira VIII Governu nian, ne’ebé lidera hosi Primeiru-Ministru, Taur Matan Ruak.

Iha findesemana, loron 20 no 21 fulan-agostu, partisipa ona iha serimónia graduasaun ba pilotu sira hosi eskola aviasaun nian Aero Flyer Institute no hala’o sorumutuk ofisiál ida ho Sidrotun Naim, Diretora ba asuntu akadémiku no estudantíl sira iha IPMI International Business School. Sidrotun Naim mós nu’udar Diretora Sentru Akuakultura Sustentável no Estudu Patolojia nian no uluk nu’udar peskizadora Harvard Medical School nian.

Iha loron 22 fulan-agostu, Fidelis Magalhães hetan entrevista husi Detikcom, portál ida kona-ba notísia dijitál Indonézia nian. Tuir mai halo tan palestra rua, ida iha Universidade Atmajaya no ida seluk iha IPMI International Business School, kona-ba investimentu iha Timor-Leste no prosperidade rejionál. Ministru halo mós diskusaun ho responsavel sira husi universidade rua ho objetivu atu kria programa kooperasaun ida entre universidade rua refere no instituisaun governamentál nasionál sira, hanesan INAP no Universidade sira iha Timor-Leste. Universidade Atmajaya hakarak mós oferese bolsu estudu ba estudante timoroan sira ne’ebé hakarak estuda iha universidade ida-ne’e iha kapitál indonézia. Ministru realiza tan reuniaun ida ho Harvard Club Indonézia nian iha IPMI International Business School.

Nomos, durante loron 22 ne’e, Ministru Prezidénsia Konsellu Ministrus, hala’o mós sorumutuk ofisiál tolu. Sorumutuk dahuluk ho fundadór Komunidade Polítika Esterna Indonézia nian, diplomata Dino Pati Djalal, iha ne’ebé sira ko’alia kona-ba prosesu dezenvolvimentu iha Timor-Leste no kooperasaun rejionál. Iha sorumutuk daruak ho Lawrence Haddad, Diretór Ezekutivu Global Alliance for Improved Nutrition (GAIN) nian no laureadu iha tinan 2018, ho Prémiu Mundiál Alimentasaun nian, husi ninia serbisu ba nivel nutrisaun materna no infantíl, atu alkansa seguransa ai-han no hamenus atrazu iha kreximentu infantíl. Durante sorumutuk ne’e, Ministru konvida mós responsavel GAIN atu vizita Timor-Leste hodi fó kontinuidade ba diskusaun kona-ba posibilidade dezenvolvimentu ba produsaun ai-han nasionál no ba apoiu programa Governu nian hodi kombate malnutrisaun. Iha kalan, Ministru Fidelis Magalhães realiza sorumutuk ida no resesaun ofisiál ho emprezáriu indonéziu sira no reprezentante sira Bolsa de Valores nian iha Indonézia, hodi diskute kona-ba potensiál oportunidade investimentu nian iha Timor-Leste no ninia aspetu legál no prosedimentu sira.

Iha loron 23 fulan-agostu, Ministru Fidelis Magalhães hahú ninia loron ho palestra ida iha Universidade Nasionál Dezenvolvimentu Veteranus iha Jakarta (UPN Veteran), iha ne’ebé nia ko’alia kona-ba polítika públika, kona-ba asuntu bilaterál ho Indonézia no rejionál sira. Diskute mós ho responsavel sira husi universidade ne’e kona-ba posibilidade kooperasaun nian ho INAP no ho universidade nasionál sira, bolsa estudu no interkámbiu ba estudante sira. 

Iha loro-kraik, nia hala’o sorumutuk ho Ministru Koordenadór ba Asuntus Marítimus no Investimentu Repúblika Indonézia nian, Luhut Binsar Pandjaitan, hodi ko’alia kona-ba asuntu oin-oin ho karater bilaterál no rejionál, maka hanesan prosesu adezaun Timor-Leste nian ba ASEAN, investimentu ekonómiku, livre mobilidade sirkulasaun entre nasaun rua nian no livre vistu ba sira-nia sidadaun.

Loron ne’e termina ho enkontru ofisiál ida ho Primeiru-Sekretáriu Assuntus Polítikus ba Indonézia, Malázia no Timor-Leste husi Embaixada Kanadá iha Jakarta, Antoine Nouvet, iha ne’ebé ko’alia kona-ba vizaun VIII Governu nian ba objetivu no prioridade sira dezenvolvimentu nasionál nian. 

Iha madrugada loron 24 fulan-agostu, Ministru Fidelis Magalhães hala’o nia viajen husi Jakarta ba Roma, iha ne’ebé sei lidera delegasaun governamentál, komposta mós husi Ministru Turizmu, Komérsiu no Indústria, José Lucas do Carmo da Silva, ne’ebé sei reprezenta VIII Governu Konstitusionál, iha Vatikanu, iha loron 27 fulan-agostu oinmai, iha serimónia kriasaun ba Kardeál foun na’in-21, ne’ebé sei inklui Kardeál timoroan dahuluk, Dom Virgílio do Carmo da Silva.