……………………………………………………………………………………………………………
Komunikadu Imprensa
Sorumutuk Konsellu Ministrus nian iha loron 24 fulan-agostu tinan 2022
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Ensinu Superiór, Siénsia no Kultura, Longuinhos dos Santos, kona-ba rejime jurídiku ba estabelesimentu sira ensinu superiór nian. Projetu Dekretu-Lei ida-ne’e hetan ona deliberasaun iha Sorumutuk Konsellu Ministrus iha loron 15 fulan-juñu tinan 2022, maibé tanba iha alterasaun balun iha faze redasaun finál, presiza submete Projetu Dekretu-Lei ida-ne’e nian ba deliberasaun foun.
….
Aprova mós projetu Dekretu Governu nian, ne’ebé aprezenta husi Ministru Administrasaun Estatál, Miguel Pereira de Carvalho, ba kriasaun Misaun hodi Apoia prosesu Resenseamentu Eleitorál Giné-Bisau nian tinan 2022 (MAPRE-GB 2022), ba eleisaun ne’ebé prevee ba loron 18 fulan-dezembru oinmai. Kriasaun ba MAPRE-GB 2022 ne’e tuir pedidu apoiu nian atu organiza no realiza resenseamentu eleitorál ne’ebé Giné-Bisau husu, hodi rekoñese kontributu importante husi misaun tolu timor nian hodi apoia prosesu eleitorál iha Giné-Bisau, ne’ebé estabelese tiha ona iha tinan 2013, 2014 no 2018, hodi hala’o eleisaun ne’ebé livre no justu iha país ida-ne’e. A MAPRE-GB 2022 sei fó asisténsia téknika no promove asaun formasaun no kapasitasaun rekursus umanus ba órgaun administrasaun eleitorál Giné-Bisau nian no sei promove ekipamentu teknolójiku hodi halo resenseamentu eleitorál.
….
Ikusliu, Konsellu Ministrus aprova ona projetu Rezolusaun Governu nian, ne’ebé aprezenta husi Ministru Finansas, Rui Augusto Gomes, kona-ba apoiu finanseiru ba realizasaun atividade resesaun no komemorasaun ba elevasaun Dom Virgílio do Carmo da Silva, SDB, hanesan Kardeál. Governu valoriza jestu signifikativu ida-ne’e husi prezensa no importánsia Igreja Katólika nian iha sosiedade timoroan, no asosia iha momentu moris koletiva ida-ne’e, hodi apoia no komemora atividade resesaun Dom Virgílio do Carmo da Silva, hanesan kardeál timoroan dahuluk. Nune’e, mak aprova apoiu finanseiru ida ho valór hamutuk US$220.732,00, ba realizasaun atividade sira ne’ebé refere ona, maihusi dotasaun ba Governu tomak no hafoin selebrasaun uluk akordu subvensaun públika nian ida entre Governu no Konferénsia Episkopál Timorense. Elevasaun Dom Virgílio do Carmo da Silva ba Kardeál sei hala’o iha konsistóriu loron 27 fulan-agostu tinan 2022, iha Vatikanu. REMATA