Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 10 fulan-agostu tinan 2022

Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei rua, ne’ebé aprezenta husi Primeiru-Ministru no Ministru Interiór, Taur Matan Ruak, no husi Vise-Ministru Interiór, António Armindo.

• Dekretu-Lei dahuluk ne’e kona-ba estatutu profisionál ba pesoál ho funsaun polisiál Polísia Nasionál Timor-Leste (PNTL) nian. Diploma ne’e ninia objetivu maka atu fó ba PNTL estatutu profisionál ba ninia pesoál rasik, iha perspetiva atu hadi’a kondisaun serbisu ba pesoál ida-idak, iha parte ida, atu hasa’e kuadru motivasionál no autoestima (dignidade no konfiansa) membru sira PNTL nian, hodi reforsa sira-nia kapasidade atu hasoru responsabilidade ne’ebé aumenta ba beibeik, ezijénsia no presiza efikásia iha prestasaun servisu públiku Seguransa nian, tuir nivel nesesidade sosiedade timoroan nian, ne’ebé informada, kompleksa no ezijente liután, no, iha sorin seluk, hodi adapta estatutu ne’e ho realidade sosiál foun no ho dezafiu país no mundu atuál nian.

.

• Dekretu Lei daruak ne’e ho objetivu atu halo alterasaun ba rejime remuneratóriu PNTL nian. Alterasaun ida-ne’e ho intensaun atu kumpre regra iha númeru 2 husi artigu da-24 Dekretu-Lei n. 2/2022, loron 12 fulan-janeiru nian, ne’ebé aprova ona rejime remuneratóriu PNTL nian, iha ne’ebé Estadu kompromete ona atu fó, iha tinan 2023, aumentu 15% ba remunerasaun bázika membru sira PNTL nian. Aleinde aumentu remunerasaun bázika ne’ebé prevee ona, atualiza mós diploma ne’e, hodi konsidera alterasaun ba Orgánika Polísia Nasionál Timor-Leste (PNTL) nian ne’ebé foin aprova, no mós nesesidade atu aprezenta redasaun ida ne’ebé adekuadu liután, hodi fasilita interpretasaun ba artigu balun ne’ebé hatuur iha versaun diploma ne’ebé vigora hela.

.

Projetu Rezolusaun Governu nian hodi kria Festival Nasionál Desportu, ne’ebé aprezenta husi Ministru Edukasaun, Juventude no Desportu, Armindo Maia no husi Sekretáriu Estadu Juventude no Desportu, Abrão Saldanha, mós hetan ona aprovasaun. Kriasaun festival ida-ne’e, ho hanoin atu halibur no kria unidade ba populasaun timoroan ne’ebé ho objetivu atu selebra atividade desportiva, hodi promove atividade fízika no promove desportu iha ninia modalidade oioin, iha planu ba edukasaun fízika no iha kategoria desportu tradisionál, rekreativu, inkluzivu no kompetisaun iha nivel aas. Festival ne’e nia objetivu atu sai hanesan forma ida ne’ebé hodi promove joven sira, nune’e mós ba populasaun sira seluk, importánsia husi desportu no atividade fízika, ninia benefísiu sosiál, ekonómiku, polítiku no iha área saúde públika nian. Ne’e sei sai eventu ida ne’ebé sei hala’o iha tinan-tinan, ne’ebé nia estrutura, kalendarizasaun no modelu tenke define mós, tinan-tinan, husi Ministériu ne’ebé responsavel ba área desportu nian.

.

Konsellu Ministrus aprova ona projetu Rezolusaun Governu nian, ne’ebé aprezenta husi Ministra Negósius Estranjeirus no Kooperasaun, Adaljiza Albertina Xavier Reis Magno, ne’ebé aprova akordu entre Governu Repúblika Demokrátika Timor-Leste nian ho g7+, kona-ba montante, finalidade no uzu ba subsídiu ne’ebé atu fó husi Repúblika Demokrátika Timor-Leste ba organizasaun intergovernamentál ida-ne’e. Ho akordu ida-ne’e, ne’ebé asina ona husi parte rua iha loron 21 fulan-marsu tinan 2022, nia objetivu atu kontribui ba atividade sira g7+ nian, Governu sei aloka hosi tinan 2022 to’o 2027, montante dolar amerikanu millaun ida, tinan-tinan. Subsídiu ida-ne’e tenke uza ba promosaun kooperasaun nian entre Estadus-Membrus no ba finansiamentu despeza sira funsionamentu g7+ nian  no ba organizasaun sorumutuk ministeriál nian tinan-tinan.

.

Ikusliu, Konsellu Ministrus delibera ona hodi aprova prosedimentu sira aprovizionamentu nian, liuhosi konkursu públiku internasionál, hodi hala’o kontratu públiku ba konstrusaun eskema irrigasaun nian iha Laivai, iha Munisípiu Lautein no Galata, no iha Munisípiu Baukau, tuir projetu ne’ebé aprezenta husi Ministru Agrikultura no Peskas, Pedro dos Reis. Projetu irrigasaun Galata nian ne’e sei kobre área ida ho ektare 600 no sei benefisia uma-kain hamutuk 750. Projetu irrigasaun Laivai nian sei kobre ektare 300, ne’ebé inklui natar ne’ebé iha ona ektare 176 no sei benefisia uma-kain hamutuk 434. REMATA