Ministériu Edukasaun, Juventude no Desportu, iha loron 4 fulan-agostu tinan 2022, lansa ona programa lubun ida iha área edukasaun nian, iha serimónia ida-ne’ebé partisipa husi Primeiru-Ministru, Taur Matan Ruak, no serimónia ne’e hala’o iha Eskola 30 de agosto, iha Dili.

Iha eventu ne’e, lansa programa sira Eskola iha Uma, bolsa méritu, konesaun ‘Internet’ iha eskola, distribuisaun kaderneta sira, estudu viabilidade ba Eskola Raiz, distribuisaun karteira eskolár sira no atribuisaun prémiu.

Xefe Governu ne’e, iha ninia intervensaun, afirma katak “programa sira ne’e bele kontribui ba esforsu ita-nia profesór sira nian hodi apoia alunu sira, hodi konkista sira-nia espasu, sira-nia fatin no mós sira-nia futuru”.

Ministru Edukasaun, Juventude no Desportu, Armindo Maia, salienta katak programa sira ne’e mai husi “vizaun no kompromisu Governu Konstitusionál VIII nian atu koloka ema iha sentru dezenvolvimentu”.

Serimónia ne’e, marka prezensa husi membru Governu no Parlamentu Nasionál, korpu diplomátiku, parseiru dezenvolvimentu, profesór no alunu sira.