Governu Timor-Leste

Prezidénsia Konsellu Ministrus

VIII Governu Konstitusionál

...........................................................................................................................

Komunikadu Imprensa

Sorumutuk Konsellu Ministrus nian iha loron 27 fulan-jullu tinan 2022

Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Lei, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, kona-ba Suplementu remuneratóriu ba funsionáriu públiku no ajente sira Administrasaun Públiku nian ne’ebé hala’o sira nia funsaun hanesan formadór iha Administrasaun Públika.

Projetu Dekretu-Lei ida-ne’e ho objetivu atu estabelese rejime ida ne’ebé bele fó retribuisaun finanseira ba responsabilidade no kompleksidade boot funsionáriu no ajente públiku administrativu sira nian, ne’ebé envolve iha realizasaun asaun formasaun jerál ka espesializada nian. Suplementu foun ida-ne’e hakarak atu aproveita di’ak-liu kapasidade formadora ne’ebé, oras ne’e daudaun, iha ona Administrasaun Públika nasionál nia laran, nune’e hodi kontribui ba rasionalizasaun rekursu nasionál sira.

Valór oras suplementu remuneratóriu formadór nian sei fiksa tuir grau kompleksidade funsionál karreira formandu sira nian. Entidade ne’ebé responsavel ba pagamentu husi suplementu ida-ne’e mak entidade ida ne’ebé responsavel hodi halo formasaun ka entidade sira ne’ebé selu.

.

Aprova ona projetu Dekretu-Lei, ne’ebé aprezenta husi Ministru Finansas, Rui Augusto Gomes, ne’ebé ho objetivu atu estabelese Rejime Jurídiku Parseria Públiku Privada (PPP) Servisu Diagnóstiku nian.

Projetu Dekretu-Lei ida ne’e, hakarak atu estabelese kuadru jurídiku ida ne’ebé bele aplika ho espesífiku ba akordu PPP nian relasiona ho Servisu Diagnóstiku laboratoriál no diagnóstiku liuhusi imajen, no define rejime ida ne’ebé fleksivel no adekuadu liu ba kolaborasaun ho parseiru privadu ida iha prestasaun servisu públiku nian, no prevee mekanizmu sira ne’ebé asegura sustentabilidade, alokasaun risku, operasionalidade no kualidade servisu ne’ebé sei fó ba populasaun. Nune’e, estabelese kuadru jurídiku ida ne’ebé klaru, justu, previzivel no estavel ne’ebé permite atu estimula no dada investimentu privadu no garante prestasaun servisu públiku diagnóstiku laboratoriál no diagnóstiku liuhusi imajen.

Konsellu Ministrus aprova ona projetu Rezolusaun Governu nian, ne’ebé aprezenta mós husi Ministru Finansas, Rui Augusto Gomes, ne’ebé hatuur valór másimu atu selu ba akizisaun beins imóveis (propriedade sira) no tanba lakon edifikasaun (sasán /soin sira ne’ebé iha rai-leten), lakon benfeitoria (hadi’a propriedade ne’ebé iha tiha ona), lakon área floresta no agríkola nian, no tanba tenke hapara atividade sira hanesan pekuária, peskas no foti masin iha área implementasaun projetu rekualifikasaun Aeroportu Internasionál Prezidente Nicolau Lobato nian.

.

Aprova mós projetu Dekretu-Lei, ne’ebé aprezenta husi Ministru Obras Públikas, Abel Pires da Silva, ba alterasaun dahuluk husi Dekretu-Lei n. 11/2006 loron 12 fulan-abríl, kona-ba kriasaun Institutu Jestaun Ekipamentu Timor-Leste (IGE – Sigla iha lian portugés) no aprovasaun ba ninia estatutu.

Alterasaun ida-ne’e, ho objetivu atu kompatibiliza estatutu IJE nian, ne’ebé define ona iha Dekretu-Lei Organizasaun Administrasaun Direta no Indireta, ho Orgánika Governu Konstitusionál VIII nian, no hodi fó kompeténsia foun ne’ebé sei permite atu aproveita di’ak liután rekursu sira IJE nian, hodi hadi’a servisu públiku ne’ebé Estadu fó ba sidadaun sira.

Nune’e, ba oin sei atribui kompeténsia no atribuisaun sira ne’ebé IJE halo ona durante tinan barak hodi apoia situasaun barak ne’ebé presiza intervensaun lalais hodi hadi’a filafali tráfegu rodoviáriu ho seguru no evita inundasaun liuhusi limpeza no normalizasaun ba mota sira. Instituisaun ida-ne’e iha ekipamentu ne’ebé presiza hodi hala’o tarefa sira-ne’e, no iha mós koñesimentu tékniku no esperiénsia iha terrenu hodi bele realiza, hanesan parte ida husi sira-nia atribuisaun, la’ós de’it tarefa sira ne’ebé prevee ona, hanesan jestaun ba ekipamentu pezadu sira, maibé mós halo atividade manutensaun ba estrada, hasai rai-henek no hamoos mota, no halo estabilizasaun ba mota-ninin no bareira sira.

Ho diploma ida-ne’e, estabelese figura Diretór Ezekutivu nian, ho kompeténsia atu dirije no jere servisu IJE tuir diretrizes husi ninia Konsellu Administrasaun. No atribui mós kompeténsia ba Prezidente Konsellu Administrasaun IJE nian podér atu aprova despeza, autoriza no aprova aprovizionamentu no asina kontratu sira tuir lei.

.

Konsellu Ministrus aprova ona projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, no Ministru Edukasaun, Juventude no Desportu, Armindo Maia, ne’ebé ho objetivu atu aprova Programa Merenda Eskolár nian.

Programa Merenda Eskolár ne’e, nu’udar subsídiu ida ne’ebé fó iha ámbitu asaun sosiál eskolár, ninia objetivu hodi asegura direitu ba refeisaun loron-loron ho hahán ne’ebé saudavel, ekilibrada no indispensavel ba dezenvolvimentu no insentiva partisipasaun labarik sira nian iha edukasaun pré-eskolár no iha ensinu báziku, públiku no partikulár, ne’ebé integra iha rede públika oferta serbisu públiku iha territóriu nasionál, hodi promove ninia prosesu ensinu no aprendizajen nian. Iha programa ida-ne’e nia okos, sei fornese  refeisaun ba alunu sira husi estabelesimentu edukasaun pré-eskolár no ensinu báziku, públiku no partikulár nian ne’ebé integra iha rede públika oferta servisu públiku nian, ne’ebé lokaliza iha territóriu nasionál.

Subsídiu sira ne’ebé fó iha ámbitu programa ida-ne’e, ninia natureza maka subvensaun públika sira. Subsídiu alimentár ne’e, atu uza de’it hodi sosa hahán no subsídiu administrativu, ne’ebé ho objetivu atu suporta despeza ho enkargu administrativu sira ne’ebé mosu husi ezekusaun programa ne’e nian.

Implementadór sira Programa Merenda Eskolár nian mak estabelesimentu edukasaun pré-eskolár no ensinu báziku, públiku no partikulár ne’ebé integra iha rede públika oferta servisu públiku nian, ne’ebé lokaliza iha territóriu nasionál no organizasaun komunitária sira, grupu komunitária ka hanesan, liuliu asosiasaun sein personalidade jurídika.

Montante subsídiu ne’ebé atribui iha ámbitu Programa Merenda Eskolár nian fiksa ona ho US$ 0,42 ba kada loron eskola no ba kada alunu.

.

Ikusliu, Konsellu Ministrus aprova projetu proposta Rezolusaun Parlamentu Nasionál nian ba ratifikasaun akordu kompaktu Millennium Challenge Coorporation, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães.

Akordu kooperasaun ida-ne’e asina ona iha loron 19 fulan-jullu liubá, sei implementa durante tinan lima, no iha montante globál dolar amerikanu millaun 484.

Programa ne’e sei haree ba komponente prinsipál rua, ida atu hadi’a sistema bee, saneamentu no drenajen no ida seluk iha área edukasaun no formasaun nian. Komponente dahuluk ho objetivu atu hamenus kontaminasaun ba bee moos no bee iha rai-okos ne’ebé bele fó moras, impede moris-di’ak no saúde ba labarik no adultu sira. Komponente ida-ne’e inklui, konstrusaun ba fábrika ida hodi prodús dezinfetante kímiku ba abastesimentu bee iha sidade, harii sistema sentrál dahuluk bee reziduál nian iha país, hadi’a rede drenajen ba kapitál Dili no ba munisípiu viziñu haat, reforma polítika no institusionál sira nune’e mós mudansa sosiál no komportamentu, hadi’a sistema saneamentu báziku no jestaun bee nian iha nivel doméstiku. Komponente daruak ho objetivu atu hadi'a kualidade ensinu sekundáriu nian ba alunu sira, liuhusi hadi'a ensinu sekundáriu no lideransa eskolár nian. Projetu ne'e sei estabelese instituisaun formál sertifikasaun formasaun nian dahuluk ba formasaun profesór sira iha nasaun ne’e, sei hanaran “Sentru Exelénsia”, ne'ebé sei fó formasaun no sertifikasaun profisionál ba profesór no lideransa sira ensinu sekundáriu nian iha tempu ohin loron no aban-bainrua nian. Investe iha formasaun ba profesór sira, sei prodús eskola sekundária sira ne'ebé di'ak liu, ho alunu sira ne’ebé bein preparadu ba merkadu serbisu ka ba edukasaun pós-sekundária no nune’e hadia ninia kapasidade hodi kontribui ba kreximentu ekonómiku país nian. REMATA