Governu Timor-Leste, Ajénsia Koreana ba Kooperasaun Internasionál (KOICA – Sigla iha lian inglés) no Programa Nasoins Unidas ba Dezenvolvimentu (PNUD), iha loron 22 fulan-jullu tinan 2022, lansa projetu ida ho dolar amerikanu millaun 6,2 hodi aumenta kapasidade joven sira nian ba serbisu no ba emprendedorizmu.

Projetu ne’ebé hanaran “YEES – Youth Employment and Entrepreneurship Skills” (kompeténsia empreendedorizmu no serbisu ba juventude), ne’ebé sei hala’o durante tinan 6, hosi tinan 2022 to’o 2027 no sei implementa iha munisípiu haat, Dili, Baucau, Ermera no Likisá.

“YEES”, sei finansia husi KOICA no PNUD no sei sai hanesan entidade prinsipál implementadora, iha kolaborasaun ho Ministériu Turizmu, Komérsiu no Indústria (MTCI – Sigla iha lian portugés) Sekretaria Estadu Formasaun Profisionál no Empregu (SEFOPE), Institutu Apoiu ba Dezenvolvimentu Empreendedorizmu (IADE), Sekretaria Estadu Juventude no Desportu (SEJD) no entidade sira seluk hanesan Banku Nasionál Komérsiu Timor-Leste (BNCTL)

Projetu ne’e ho objetivu atu hakat liu oportunidade sustentavel sira ne’ebé sei falta no aumenta kapasidade joven sira nian ba servisu no auto empregu. Projetu ne’e, sei haree ba iha aspetu prinsipál rua. Dahuluk, refere ba aumentu kapasidade joven nian hodi hetan servisu, ho hasa’e sira-ninia kapasidade sosiál, hodi fornese akonsellamentu no informasaun kona-ba servisu no esperiénsia profisionál liuhusi oportunidade estájiu nian. Daruak, hakarak aumenta kriasaun kampu serbisu, no promove empreendedorizmu entre joven ho formasaun empreendedorizmu, kompetisaun emprezariál no asesu finanseiru liuhusi eskema ida ne’ebé garantia empréstimu ho funan ne’ebé ki’ik.

Serimónia lansamentu ne’e, kompostu husi asinatura akordu parseria nian ida entre KOICA ho Governu Timor-Leste, ne’ebé reprezenta husi Ministru Finansas, Rui Augusto Gomes. Kontinua ho asinatura akordu doasaun nian entre KOICA ho PNUD Timor-Leste, no asinatura dokumentu projetu entre PNUD ho Ministériu Turizmu, Komérsiu no Indústria, ne’ebé reprezenta husi Vise-Ministru Komérsiu no Indústria, Domingos Lopes Antunes.

Membru Governu rua ne’e, iha sira-nia intervensaun agradese ba KOICA no ba PNUD liuhusi esforsu hamutuk hodi dezenvolve projetu ne’e.

Vise-Ministru, temi kestaun balun ne’ebé urjente tebes entre foin-sa’e sira, hanesan falta alfabetizasaun finanseira, abilidade matemátika, kontabilidade bázika, kontabilidade no jestaun nian, ne’ebé mak esensiál iha dezenvolvimentu ba negósiu ruma.

Ministru Finansas haree liu importánsia kapitál umanu nian hodi dada investimentu no redús moris-ki’ak.

Reprezentante rezidente ein ezersísiu PNUD nian iha Timor-Leste, Lazima Onta-Bhatta, hato’o ninia agradesimentu no respeitu ne’ebé kle’an ba Governu Timor-Leste, liuliu ba MTCI, SEFOPE, IADE, SEJD, nune’e mós ba KOICA no BNCTL ba orientasaun no kontribuisaun iha dezenvolvimentu projetu ida-ne’e nian.

Embaixadór Repúblika Koreia nian iha Timor-Leste, Jeong Ho Kim, afirma ona katak Projetu YEES ne’e nu’udar parte hosi serbisu kolaborativu ne’ebé hala’o ona entre Koreia ho Timor-Leste, iha área dezenvolvimentu ekonómiku no empregu nian. Diplomata ne’e manifesta ona ninia dezeju katak, projetu YEES ne’e bele rezolve problema dezempregu joven Timor-Leste nian, nune’e mós hadi’a kompeténsia empregu foin-sa’e timoroan sira nian.

Serimónia ne’e mós konta ho partisipasaun husi Vise-Ministru Finansas, António Freitas, Sekretáriu Estadu Formasaun Profisionál no Empregu (SEFOPE), Alarico de Rosário, Diretora KOICA iha Timor-Leste, Eunju Cha, Diretór-Jerál, diretór ezekutivu, diretór sira hosi SEFOPE, IADE, MTCI no parseiru dezenvolvimentu sira.