Sorumutuk Konsellu Ministrus nian iha loron 20 fulan-jullu tinan 2022
Prezidénsia Konsellu Ministrus
VIII Governu Konstitusionál
...........................................................................................................................
Komunikadu Imprensa
Sorumutuk Konsellu Ministrus nian iha loron 20 fulan-jullu tinan 2022
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian, ne’ebé aprezenta husi Ministru Interiór, Taur Matan Ruak no Vise-Ministru Interiór, António Armindo, kona-ba subsídiu diáriu alimentasaun ba ofisiál sira Servisu Migrasaun nian. Projetu Dekretu Governu ida-ne’e ninia objetivu mak atu estabelese valór diáriu no regularizasaun tuirmai ba pagamentu subsídiu ida-ne’e nian, tuir prevee ona iha Estatutu Pesoál Servisu Migrasaun nian, nune’e hodi halo hanesan ho valór subsídiu alimentasaun ne’ebé prevee ona iha rejime remuneratóriu ba Forsas Defeza no Seguransa. Valór diáriu husi subsídiu ne’ebé define ona iha diploma ida-ne’e maka dolar amerikanu sanulu.
Konsellu Ministrus delibera hodi autoriza Ministru Finansas, Rui Augusto Gomes, atu selebra Akordu Finansiamentu nian ida ho Banku Mundiál (Asosiasaun Internasionál ba Dezenvolvimentu) kona-ba projetu fornesimentu bee iha Dili. Akordu ne’e ho objetivu atu halo kontratasaun ba empréstimu ida ho valór besik dolar amerikanu millaun 121, ba períodu maturidade tinan 40, hodi finansia projetu fornesimentu bee nian ba Dili. Programa ne’e sei dezenvolve liuhusi finansiamentu ida-ne’e ho durasaun tinan hitu no komponente tolu: komponente dahuluk refere ba dezenvolvimentu infraestruturas abastesimentu bee nian, komponente daruak kona-ba hadi’a kapasidade institusionál ba servisu sira iha setór ida-ne’e no komponente datoluk ho objetivu atu hadi’a jestaun projetu nian.
Konsellu Ministrus mós aprova projetu Dekretu-Lei, ne’ebé aprezenta mós husi Ministru Finansas, kona-ba alterasaun dahuluk ba Dekretu-Lei n. 30/2011, loron 27 fulan-jullu, kona-ba kondisaun no prosedimentu sira atu observa relasiona ho importasaun veíkulu sira nian. Liu ona tinan sanulu hafoin aprovasaun ba diploma ida-ne’e, iha duni nesesidade atu aprezenta kondisaun sira ne’ebé ezijente liu ba importasaun veíkulu no atu kontrola operasaun ba importasaun nian ho efikás liu, hodi asegura protesaun ba konsumidór no meiu ambiente. Ba efeitu ne’e, projetu Dekretu-Lei ida-ne’e hakarak atu inklui mós bandu importasaun motorizada no veíkulu lijeiru (karreta ki’ik) pasajeiru nian no mistu [karreta ne’ebé tula pasajeiru no sasán merkadoria nian] ne’ebé la kumpre kondisaun téknika sira sirkulasaun nian iha territóriu nasionál no atu kria rejime kontraordenasionál ida hodi fó kastigu ba sira ne’ebé la kumpre regra ne’ebé hatuur iha diploma ne’e. Hakarak mós atu simplifika prosedimentu importasaun veíkulu sira nian, hodi elimina autorizasaun prévia no konsentra verifikasaun ba rekizitu legál sira importasaun nian iha momentu ida de’it, hodi nune’e, fasilita importasaun veíkulu sira nian tuir lei.
Ministru Prezidénsia Konsellu Ministrus, Fidelis Manuel Leite Magalhães, aprezenta opsaun polítiku-lejizlativa ne’ebé sai hanesan baze hodi kria rejime remuneratóriu ida ba titulár órgaun sira Administrasaun Indireta Estadu nian, no buka hodi estabelese remunerasaun ne’ebé aliña tuir kritériu objetivu sira, atubele asegura interese públiku no tratamentu hanesan ba situasaun ne’ebé hanesan, tuir posibilidade.
Ikusliu, Vise-Ministru Negósius Estranjeirus no Kooperasaun, Julião da Silva, halo aprezentasaun ida kona-ba prosesu kandidatura Timor-Leste nian nu’udar membru Konsellu Direitus Umanus Organizasaun Nasoins Unidas nian (ONU), ba períodu tinan 2024 to’o 2026. Karik eleitu, ida-ne’e hanesan ba dala uluk Timor-Leste halo parte hanesan membru konsellu direitus umanus nian, hodi kontribui ba promosaun direitus umanus liuhusi respeitu-malu no diálogu. Promosaun no protesaun ba direitus umanus nu’udar prioridade ida ba Timor-Leste, tantu iha nivel nasionál, nomos iha nivel internasionál. REMATA
