Governu Timor-Leste, liu husi Sekretaria Estadu Juventude no Desportu (SEJD), atribui prémiu ba atleta na’in haat (4) ne’ebé konsege hetan medalla lima (5) iha festa desportiva SEA Games (Southeast Asian Games) 2022 iha Vietnám, iha loron 27 Fulan-Maiu tinan 2022.

Sekretáriu Estadu Juventude no Desportu, Abrão Saldanha, hateten prémiu ne’ebé mak Governu oferese bá atleta sira tuir diploma ministeriál no mós hetan konkordánsia husi entidade desportiva hanesan Komisaun Nasionál Desportu (KND) ne’ebé hahú husi Komisaun, Konfederasaun inklui reprezentante atleta no treinadór sira.

Atleta, Felisberto de Deus, hetan medalla osan mutin rua (2) husi halai metru rihun lima no 10 no simu prémiu hamutuk $15,000.00 ne’ebé kompostu husi prémiu exelénsia $10,000 no bolsa desportiva $5,000.

Atleta boksista, Delio Mozinho hetan medalla osan mutin ida (1) ho prémiu $ 7,500.00,  prémiu exelénsia $5,000 no $ 2,5000 bolsa desportiva.

Nune’e mós ho Atleta rua ne’ebé oferese medalla osan metan rua (2), José da Silva hanesan boksista no Taekwondo, Santina S. Fernandes, kada ema hetan prémiu ho nia valór $ 4,500.00 $3.000 ba prémiu exelénsia no $1.5000 bolsa desportiva.

Entretantu, iha oportunidade ne’e SEJD mós oferese prémiu ba treinadór ka ekipa téknika ho klubu husi modalidade sira mak hanesan, Atletizmu $5.000, Boxing 4,000.00 no Taekwondo $1,500.00

SEJD, iha atleta 38 mak reprezenta Timor-Leste partisipa iha SEA Games 2022 iha Vietnám ne’ebé kompostu husi atleta 25 iha modalidade futeból no atleta 13 seluk husi modalidade Taekwondo, Boxing, Natasaun (Nani), Karaté, Halterofilizmu (Hit Besi) no Korrida (Halai).