Ministru Prezidénsia Konsellu Ministrus, Fidelis Manuel Leite Magalhães, hala’o sorumutuk ho Prezidente Repúblika, José Ramos-Horta, iha sesta-feira, loron 27 fulan-maiu tinan 2022. Sorumutuk ne’e hala’o iha Palásiu Prezidensiál, iha Ai-tarak Laran, Dili, tanba hetan konvite husi Xefe Estadu no ho objetivu atu informa ba nia kona-ba pontu situasaun iha prosesu negosiasaun Kompaktu entre Governu Timor-Leste ho Millennium Challenge Corporation (MCC), no mós espetativa no detalle sira kona-ba prosesu implementasaun programa nian sira ne’ebé hala’o tuir Kompaktu ida-ne’e.

Sorumutuk ne’e hala’o hafoin diskusaun kona-ba Kompaktu entre Primeiru-Ministru, Prezidente Repúblika no Ministru Prezidénsia Konsellu Ministrus.

Liuhusi Kompaktu ida-ne’e, Timor-Leste no MCC nia objetivu atu hadi’a saúde no kualifikasaun sira kapitál umanu nian iha Timor-Leste, hodi hamenus risku husi moras sira ne’ebé kauza husi bee ne’ebé kontamina ona liuhusi konstrusaun sentru ida ba tratamentu no abastesimentu bee no tratamentu ezgotu nian. Aleinde ne’e, akordu ne’e sei fasilita atu kria Sentru Exelénsia ida ba área edukasaun, ne’ebé ho objetivu atu hadi’a kualidade ensinu sekundáriu nian iha país.

Pakote asisténsia tinan 5 nian sei garante liuhusi Kompaktu ida-ne’e ho valór estimativu dolar amerikanu millaun 484, konsiste husi dolar amerikanu millaun 420 ne’ebé oferese husi MCC, hamutuk ho kontribuisaun ida dolar amerikanu millaun 64 ne’ebé oferese husi Governu Timor-Leste nian.

Akompaña mós Ministru Prezidénsia Konsellu Ministrus iha vizita ne’e mak Embaixadór Constâncio da Conceição Pinto, Diretór Ezekutivu CDT-TL, ne’ebé halo aprezentasaun badak ida kona-ba kestaun téknika sira husi projetu ne’ebé sei implementa iha ámbitu hosi Kompaktu ida-ne’e.